Wó Krabata źo źinsa zeger 18.00 w gósćeńcu "Zur Dorfaue" w Janšojcach. Dr. Susanne Hozyna powěda wó tom znatem serbskem guslowarju. Pó pśednosku spiwa kupka "Drjewjanki" a Wy móžośo sami teke sobuspiwaś. Janšojske Domowinarje su sebje pśepšosyli kupki z Rogowa, Radowize, Turjeja, Mósta a Barbuka. A gaž maśo lušt, wupórajśo se teke Wy do Janšojc.

Wupłaśijo se załožyś w Dešnje wejsnu lodu? Za tym pšašaju źinsa wjacor zeger 19.00 na wobydlarskej zgromaźinje w tamnem sportlarskem domje. K tomu su kazali ako referenta Wolfganga Grölla, ak’ jo producěrował wjele telewizijnych reportažow a wón se zaběra wósebnje z wuspěšnymi załoženjami wejsnych lodow.

Serbske arije zazněju witśe zeger 14.00 w Žylojskem gósćeńcu. Šula za dolnoserbsku rěc a kulturu pśepšosyjo wšych, ak’ kśě dožywiś rědny wjasoły program a snaź sami sobugótowaś na zmakanje z "pójsynogu". Pódla budu Žylojski chor, rejowański ansambel "Pśijaśelstwo" a wiolinowy solist z Pólskeje.

Teke Trjebinarje a Miłorazarje su źinsa wjacor na nogach. Zeger šesćich (18 g.) se zachopijo bal zjadnośeństwow w Trjebinskem domje zjadnośeństwow.

W Lubinje se zachopijo witśe cołnowarska sezona. Wót zeger 13.00 móžośo pśi tamnem wustawanišću dožywiś wjelebocny kulturny program z dujarskeju muziku a, se wě, cołnowaś a padlowaś.

Lubujośo Wy gospelowu muziku? Pón pśiźćo witśe zeger 19.30 do ewangelskeje cerkwje w Bórkowach na koncert z kupku "Spiritual and gospel singers" z Drježdźan.

Jatšowne jajka pó tradicionelnych serbskich technikach se pisaniju wšuźi we Łužycy. We wóskowej technice móžośo je wupyšniś witśe wót zeger 14.00 w muzeumowej brožni we Błobošojcach a w Dešańskem domowniskem muzejumje.
Witśe a pśezwitśe wót zeger dwanasćich do styrich (12 - 16 g.) maśo móžnosć se z teju tradicionelneju zaběru w Bórkojskej domowniskej śpje zeznawaś.
Drastwowa kupka Nowa Niwa pak pśepšosyjo njeźelu wšyknych zajmcow na take zmakanje do tamneje domowniskeje śpy.

Na "Markusowu pasiju" wót Hynca Roya w serbskej rěcy jo Wam kazane njeźelu zeger pěśich wótpołdnja (17 g.) do Kśicneje cerkwje w Zgórjelcu. Spiwaju chory z Wórjejc a ze Zgórjelca ako teke solisty a grajo Łužyska filharmonija.