Nachrichten und Veranstaltungstipps / nowosći a pórucenja

Kulturne pokazki /Veranstaltungstipps - 25.05.2012

Lubowarje kóńjow a kónjecego sporta pśidu na swóje košty w Žylowje. Wót źinsajšnego až do njeźele wótmějo se tam 42.rejtarski a skokarski turněr. Nejlěpše rejtarje budu se wuběgowaś wó titele. Mimo togo buźo burski mark, a to se wě, rejtowanje na ponyjach za źiśi a hyšći druga zaběra.

Wót Žylowa njejo daloko do Dešna. A w Dešnje móžośo w pśiducych dnjach wjele dožywiś. Domowniski muzeum jo kuždy źeń wótcynjony, tam móžośo sebje teke woglědaś nowo wugótowanu muzeumowu brožnju, źož jo wótněnta ta tak mjenowana recepcija. Mimo stawneje wustajeńce jo tuchylu tam wustajeńca z fotami znatego fotografa Ericha Schutta. Ten samy buźo swětkowne pónjeźele wótpołdnja zeger tśich sam pśez wustajeńcu wjasć a wjele k swójim fotam wulicowaś. Na łuce slězy cerkwje, potakem w bliskosći muzeja, su pón teke južo prědne wobźělniki srjejźowěkowego swěźenja, kótaryž buźo tam zachopjeńk junija.
A nic naslědku buźo wałtoru, 29.maja, pśiduce bóśonowe wjeźenje, to se zachopijo wótpołdnja zeger dweju. Zajmce zmakaju se pśed muzeumom.

Dobra adresa za swětki jo teke Serbski kulturny centrum w Slěpem. Tam móžośo sebje swětkownicu ako teke swětkowne pónjeźele woglědaś wustajeńcu z titelom „Momenty”. Pód toś tym titelom wustajone su mólowanja a grafiki wuměłcki Sabine Gutjahr. K swětkam jo Serbski kulturny centrum wót zeger jadnog´ połdnju až do zeger pěśich wótpołdnja wótcynjony. Wustajeńca buźo ale hyšći až do 29.julija pśistupna.

Swětkowny kóńc tyźenja wótmějo se w pólskem měsće Žary łužyski jermank. Sobótu budu wót zeger źewjeśich zajtša na stojnicach wokoło Starych wikow bitowaś wšake regionalne wory a na jawišću zaznějo Folk-muzika. Oficialnje wótworijo se mark zeger jadnasćich dopołdnja ze žortnym źiwadłowym pśedstajenim. Kupki z Běłeje Wódy budu spiwaś a rejowaś. Njeźelu se mark zeger źaseśich dopołdnja zachopijo. Jaden wjerašk swětkownicu buźo łužyski swajźbarski śěg, kótaryž pokažu pólske komedianty, a to teke ze scenami wěrowanja z elementami serbskich tradicijow. Teke dudy se ako tradicionalny instrument togo regiona pśedstajiju.

W Lubinje móžośo se daś slědk pśesajźiś do srjejźowěkowego casa. Koklowarje, powrjozniki, kowale a śěgate spiwarje wobsajźiju swětki stare słowjańske groźišćo w Lubinskem měsćańskem źělu Borklin/nimski Burglehn. Toś ten špektakel buźo sobótu a njeźelu, pśecej w casu wót zeger jadnasćich dopołdnja až do połnocy.

Swětkownicu buźo zasej „noc wótworjonych cerkwjow”. 10.razoju kazaju cerkwje w nocy wót swětkownice na swětkowne pónjeźele luźam na woglěd. Narske mógu sebje twarjenja woglědaś, z cłonkami wósadow pówědaś a how a tam kulturne programy dožywiś. W našom regionje su to mjazy drugim Grodkojske cerkwje, w Chóśebuzu serbska, nimska, grodowa, lutherska a katolska a teke tej w Gogolowje a Modłeji.

Swětkowne pónjeźele wóswěśijo słowjańske groźišćo w Radušu swójo 9lětne wobstaśe. K tomu wótworijo se nowa wósebna wustajeńca, w kótarejž prezentěruju namakanki archeologow pśi wurywanjach sporomje opaloweje trase w Bramborskej. Opal - to jo ta trasa za zemski płun. Wótworjenje wustajeńce buźo pónjeźele dopołdnja zeger jadnasćich.

Pó wěcej mjasecow trajucem žurnem probowem casu buźo wałtoru, 29.maj, w Tšupcańskej zakładnej šuli wjelika źiwadłowa premjera. Lajska źiwadłowa kupka wuknikow pśedstajijo swójo graśe „Smugaty kocor” w serbskej rěcy. Premjera buźo wótpołdnja zeger pěśich.