Kak połna kśwje a ranow - toś ten znaty a woblubowany pasionski kjarliž wót Paula Gerhardta zaklincy tež wót Rowniskich glosow pśi jatšownem spiwanju. Śichy pětk wótpołdnja zgłosyjo jen chor Łužyca dolnoserbski w cerkwi w Dešnje. Tam jo zeger 16.00 tradicionelny chorowy koncert. Wušej 20 lět južo spomina chor z tym koncertom na nałog pasionskego a jatšownego spiwanja na serbskich jsach. Mjaztym su druge spiwaŕki se to ako pśikład wzeli a jatšowne spiwanje na jsach zasej wózywili. Źo w Dolnej Łužycy w jatšownej nocy a k schadanju słyńca lětosa wšuźi jatšowne kjarliže zazněju, how zgónijośo. Wósebne wupominanje jo lětosa zasej pśestajenje zegerow rowno w jatšownej nocy.
***
Nejlažćej maju to snaź w Žylowje: Ned gaž wót jatšownego wognja domoj du, mógu Žylowarje za swójimi spiwaŕkami wuglědaś. Zeger 4.30 startuju žeńske a źowća pśi cerkwi. Zeger 7.00 su nejskerjej slědk wót wobchójźenja a pozawnowy chor grajo pón jatšowne kjarliže pśi cerkwi.
***
W Rubynje zachopijo se spiwanje zeger 5.00, teke we Wjerbnje startuju spiwaŕki zeger 5.00 a to pśi pomniku. Zeger 6.00 kśě pśiś k cerkwi a 6.15 se tam pón zachopijo nabóžnina.
***
W Janšojcach zachopiju krotko do 6.00 pśi cerkwi spiwaś. Pón su někak góźinku ducy a wrośe se pón k farskemu domoju.
***
W Gołbinje pśidu žeńske pó swójom spiwanju zeger 6.40 k cerkwi. Tam jo zgromadne spiwanje z pozawnowym chorom planowane a pótom nabóžnina w cerkwi.
***
Pśiglědowarje su wšuźi raźi witane. Ale pśi wšom zajmje: jatšowne spiwanje jo skerjej śichy a nutśikowny nałog a pśigědowarje dejali to respektěrowaś, to groni měrnje pśiglědaś a teke pśi wótmólowanju z handijom tšochu wótstawk zdźaržaś.