Rumuńske gósći we Łužycy / Rumänische Studenten besuchen Lausitz
Aby Serbow a serbsku kulturu kradu blisko zeznali, jo tuchylu źaseś studentow a studentkow uniwersity Bukarest z gósćom we Łužycy. Prědna stacija pěśdnjownego studijnego drogowanja jo rěcne gnězdo Zorja w Dešnje. Južo cora su se gósći ze Zorjakami wuměnili, źinsa dajo Maksimilian Hasacki wopóznawański kurs za dolnoserbsku rěc:
o-zuk Maksimilian Hasacki
("Se pśecej zasej wjaselijom, gaž take gósći pśidu a móžomy našu kulturu a rěc prezentěrowaś. Wóni maju wšake stacije w našej Łužycy. Naša jo ta prědna. Witśe budu jim pó wašni Zorje dolnoserbsku rěc dalej daś, maju móžnosć tśi góźiny serbski wuknuś. Pótom du hyšći do domowniskego muzeja w Dešnje. To wšo buźo rědny serbski input za gósći.")
Dalšne stacije budu mjazy drugim Lědy, Slěpe, Wórjejce a Budyšyn. Tak dožywiju studěrujuce něnto teke aktualne jatšowne nałogi ako jaja mólowaś, jatšowne spiwanje a jatšowne rejtowanje. Organizěrowała jo studijne drogowanje Elisa Mutschi Gember. Wót 2019 jo wóna lektorka za germanistiku na uniwersiśe w Bukaresće. Jeje semina "Serby - zabyta mjeńšyna?" jo zakład za tuchylny woglěd. Wóna jo pśeznanjona, až jo drogowanje mócna inspiracija za studěrujucych, kenž pó źělach samo nimskej mjeńšynje w Rumuńskej pśisłušaju.