Dešno jo dostało bronzowu medalju w europejskem wuběźowanju "Mósty twariś". Z mytom pśipóznaju aktiwity jsy na pólu wobnowjenja jsy a mjazsobny angažement. Wó tom jo bórkojski amt pónjeźele informěrował. Do togo jo se 40-głowata delegacija z Dešna w bayerskem měsće Hofheim prezentěrowała. Pśi tom su byli žeńske w serbskich drastwach a muske su sebje stajili zapustojski kłobyk. Na stojnicach w centrumje města su prezentěrowali wósebnosći z Błotow ako módrośišć, wupyšnjone jatšowne jaja a teke regionalne speciality k jěźi a piśeju.