15.03.2023 - Dalšne aktualne informacije / Weitere aktuelle Informationen
Spěchowanje serbskich projektow
Załožba za serbski lud spěchujo teke w toś tom lěśe serbske projekty. Wóna na to dopomina, až by dejali waše pšosby wó pśizwólenje srědkow Załožby za serbski lud za projekty w drugem połlěśe běžecego lěta nejpózdźej až do 31. měrca zapódaś. Na pšosby, kótarež pó toś tom terminje pla załožby dojdu, njamógu źiwaś. Za projekty w pśiducem lěśe by dejali pšosby až do kóńca julija wótedaś. Wobšyrnjejše informacije, spěchowańsku směrnicu a aktualne trjebne formulary namakaśo na internetowej stronje załožby.
+++
Für Übersetzungen: die sotra.app
Pjerjedrěśe w Lubnjowje/Federnschleißen in Lübbenau
Witśe jo wam do Lubnjowa kazane na pjerjedrěśe. Na to pśepšosyjo towaristwo "Rubiško". Za co pjerje drěju, kak se to gótujo a kaki zmysł to ma, to wšo zajmce zgóniju wót Cornelie Harms. Gaž cośo pódla byś: Pjerjedrěśe buźo w kulturnem centrumje w Lubnjowje, w tamnem ateljeju pśistupnišća tśi/Gleis 3 a zachopijo se napoł dweju (13:30). Towaristwo "Rubiško" woplěwa južo 20 lět serbske tradicije, aby se zdźaržali.
+++
Start do noweje sezony/Saisonstart im Findlingspark Nochten
Park ze zanjasonymi kamjenjami we Wochozach startujo z nowymi dopórucenjami do noweje sezony. We tych 7 temowych zagrodach stoje pśidatne ławki a lěgańske stoły za wótpócywanje. Móžno jo jězd pó parku z elektriskim mobilom. Nowo jo dyrdakojski park za źiśi, kenž se źinsa teke wótworijo. Wochožański park glěda lětosa na 20-lětny jubilej. K tomu jo za prědny maj jubilejny swěźeń myslony. Wósebne zarědowanja budu ale pó cełej sezonje ako k jatšam, dalej gólański swěźeń nazymu a ten za Halloween.