Glědamy na Serbski domowniski muzej w Dešnje. Mjaztym až su tamne słowjańske rucnikarje a wójaki swóje stany wóttwarili a domoj šli - kóńc tyźenja jo ga był pyšny kóńc sezony - wójujotej muzej a bórkojski amt dalej. Źo wó pjenjeze a wó pśichod městna muzejumoweje wjednice. Slědny stwórtk jo dało k tomu rozsud pśed zastojnstwowem sudnistwom w Chóśebuzu. Bórkojski amt měni, až dej Dešno sam zapłaśiś městno wjednice muzeja. Dotychměst jo tak było, až ceły amt, stakim teke jsy ako Brjazyna, Wjerbno, Myšyn a Góry swój późěl k muzeju na amt zapłaśiju. K tomu dajo pópšawem dalej płaśece wobzamknjenje z lěta 2000. Wót lěta 2021 jo z tym kóńc. 60.000 euro wob lěto musy Dešno wót togo casa sam zapłaśiś. A to jo jano tśeśina wšyknych personelnych koštow za muzej. To jo wjele za taku małku gmejnu. Dešno to zawěsće njoco, dokulaž groni, až wót togo což muzej cyni – wósebnje turisty pśiwabiś – ceły amt profitěrujo. Pópšawem jo Dešno dobył. Sudnistwo jo zachadny stwórtk rozsuźiło, až njejo dejał amt pjenjeze za lěśe 2021 a 22 za sebje wobchowaś. Ale tam źo jano wó technisku abo proceduralnu zmólku (Verfahrensfehler). Zasadnje jo sudnistwo wobkšuśiło, až smějo amt gmejnje pjenjeze wótśěgnuś. Něnto wšo dalej někak w luftśe wisy. Bórkowy by musał pópšawem 120.000 euro slědk płaśeś. Dešno dalej wudrogu pyta za wěste financěrowanje muzeja. Njejo wěste, lěc co teke za lěśe 23 a 24 skjaržyś. Wobej boka cakatej na pisobny wusud. Za drugu opciju, z kótarejuž by byłej amt a gmejna spokojom, by musałej se wokrejs abo kraj pógibowaś, až wordujo muzej jaden wokrejsny abo krajny muzej. To njejo pak wótwiźeś.