W ramiku Łužyca-festiwala jo Wam něnto njeźelu na sceniske cytanje w górno- a dolnoserbskej a nimskej rěcy kazane. W źiwadle na groźe w Budyšynje dožywijośo serbsku lyriku pód dwójorěcnym titelom “Wortall oder die Farben der Mandelkrähe/Wortall abo kontinent nadźije”. Teke aktualne politiske basni budu pódla, su ga w Sakskej njeźelu wolby. Znatej grajaŕce a grajaŕ Gabriela Maria Šmajdźina, Julia Klingnerec a Marian Bulank cytaju w źiwadle na groźe w Budyšynje, njeźelu, 1. septembra, wjacor zeger 19.30.

*****

Lausitz-festiwal póbitujo za sobotu klawěrny koncert w Mužakojskem parku z pianistom Marc-André Hamelin. Kórtki za koncert su rozpśedane, ale za program kołowokoło bituju hyšći dermotne wobźělenje. A to jo busowy jězd z Chóśebuza do geoparka Mužakojskich górow w Małem Kólsku. W tamnej něgajšnej cyglowni mógu se luźe wjasć daś a sam něco z głažka basliś, gaž kśě. - Dalej źo z busom do Slěpego. W tamnem serbskem kulturnem centrumje buźo to serbske w srjejźišću. Pón bus dalej jěźo do Mužakowa na koncert. Ale te luźe, kenž njamaju za koncert kórtki, mógu wóstaś w Slěpem a tam pšawje wjacerjaś, bus jich zeger 19:30 slědk do Chóśebuzu jěźo. Start za to wšykno jo zeger 14:00 wótpołdnja pśi chóśebuskem dwórnišću.
Wó pśizjawjenje pšose na adresu unesco5@lfu.brandenburg.de. Pšosym licbu wobźělnikow pśipisaś – organizatory su pśilubili malsne wótegrono, lěc móžośo sobu jěś.