Zachopjeńk nowego lěta jo cas woklapnicow. Smy za Was nazběrali, źo a ga wóni su a co wacej se tšoj we našych stronach.
Źinsa se woklapujo stare lěto
-w Janšojcach zeger 18:00 w pipanojskem gósćeńcu "K lipje"
-na Górach zeger 18:00 we wejsnem domje
-w Myšynje zeger 19:00 w domje Myšynarjow
W Bórkowach buźo njeźelu woklapnica wót zeger 16:00 w "Serbskem kralu" (Landhotel).
***
Sobotu wótpołdnja buźo wandrowanje k nowemu lětoju w Mułkojcach. Start jo zeger 14:00 pśi starej šuli.
***
Chtož lubujo wěcej to rušowanje, daś se póra sobotu do Limbarka. Tam buźo wót zeger 20:00 bal larbow we wejsnem gósćeńcu.
***
Dolnołužyski gólański muzej w Grodku prezentěrujo hyšći swóju gódownu wósebnu wustajeńcu. Žłobikowe figury a cełe gódowne žłobiki ze wšakich materialijow a casow su wiźeś sobotu a njeźelu wót zeger 14:00 do 17:00.
***
Njeźelu buźo prědna serbsko-nimska namša nowego lěta - zeger 10:00 we Žylowje, wugótowana ako muzikaliska namša z Geraldom Šejnom a pozawnistom Simonom Schunnom.
***
Až do 5. januara buźo wustajeńca Jana Buka wótwórjona: w Złem Komorowje, we tamnej wuměłstwowej zběrce Łužyca. Pśistupna buźo sobotu a njeźelu zeger 10:30 do 17:30.
***
Wósebny koncert na proze do nowego lěta buźo lětosa južo k 30. razoju. Pśedstajiju se k prědnemu razoju twórby serbskich a Serbam wusko zwězanych komponistow ako Sebastiana Elikowski-Winklera, Ulricha Pogody, Jana Cyža a dalšnych. Pśedstajenja budu w Drježdźanach, Lipsku, Barlinju, Chóśebuzu, Wórjejcach, Dolnem Wujězdźe a Budyšynje. Moderěrujo Gregor Kliem. Zachopk jo njeźelu, 5. januara, w Budyšynje.
***
W Bórkowach buźo kumštna lodowa cera srjejź jsy na swěśenišću slědny raz njeźelu, 5. januara pśistupna - wót zeger 11:00 do 19:00. Pětk a sobotu buźo wótcynjone do zeger 21:00. Pśedawaju śopłe piśa, kołowokoło jo wugótowane hejnak małe gódowne wiki.