Witśe (sobotu) rejtujo w Dešnje 22 kralow ze jsow Dolneje Łužyce wó titel "super-kral". Župa Dolna Łužyca zgromadnje z dešańskimi su toś ten super-ewent zasej na nogi stajili. Witśe w Dešnje buźo pótakem lětosny super-Kokot, wótpołdnja zeger napoł tśich (14:30) zachopijo se pśeśěg na tamnem rejtowanišćo.
***
Lěśe se z nami pomałem rozžognujo, kurjawy stupaju, list bomow se pisani a september chyla se na kóńc – to jo tradicionelnje cas, gaž na Njepilic dwórje w Rownem swěśe swój dwórski swěźeń. Lětosa jo to taki poł kulowaty, ga 25.! Wót zeger 11:00 dopołdnja grajo šalmajowa kapała. Wótpołdnja zeger 14:00 buźo namša a pó njej góźinu pózdźej zachopijo se program. Ten wugótuju ako južo w slědnych lětach Witaj-źiśownja "Milenka", muzikowy dorost slěpjańskego folklornego ansambla, serbski źiśecy ansambel ze Slěpego a, to se wě, dujaŕska kapała z Grodka. Wó śělne derjeměśe se cłonki towaristwa rowno tak staraju ako pśecej. Wše pśijaśele zbliska a zdaloka su wutšobnje pśepšosone.
***
Pšawy juwel mjazy burskimi muzejami w Bramborskej jo słomjany dom w Nowej Cali/Neuzelle. Jo to muzeum, w kótaremž pśedstajiju wšednu kulturu burskich luźi. A gaž na to se myslimy, až su teke how něga serbske luźe žywe byli, jo muzej pódobny našym burskim chromam we Błotach. Ma rowno taku carnu kuchnju, wótcynjone wognišćo abo kamin a słomjane kšywo. Gaž cośo se pśeznaniś: słomjany dom w Nowej Cali jo za woglědarjow wótcynjony wót srjody až do njeźele w casu wót zeger 11:00 dopołdnja až do 16:00 wótpołdnja.
***
"Liški bydle w depkach, ptaški w gnězdach" – to jo titel romana, kótaryž jogo awtoŕka Yvonne Zitzmann źinsa (pětk) pśedstajijo w Bórkowach w błośańskej bibliotece "Mina Witkojc", wjacor zeger 19:00. W romanje buźo to grono wó familiji, kótaraž jo pśez generacije pśecej zasej swóje byśa a bydlenja zgubiła – gronimy raz pśez pśeměnjenja w towarišnosći a historiske tšojenja.
***
Marjana Domaškojc jo wěcej ako drastwynosaŕka. To jo był pśed krotkim južo tema pśednoska historikaŕja Petša Šurmana w Serbskem muzeumje. Źinsa (pětk) wótekšyju spomnjeńsku toflu za jadnoru žeńsku z Cazowa, kótaraž jo w gótnicy źěłała a mjazy drugim źiwadłowe graśa spisała. Wótkšyśe tofle źinsa w Cazowje pśi zgromadnem wejsańskem domje buźo wótpołdnja zeger 15:00.
***
Muzeumowa brožnja w Błobošojcach/Bloischdorf pla Grodka kažo zajmcam na dłujku noc muzejow witśe (sobotu). Swěśe tam žnjowny swěźeń z kulturu, wó kótaruž staratej se źiśeca kupka a znaty a woblubowany akordeonist Manuel Meier z jadneje jsy pla Łukowa. Pśi tej góźbje prezentěrujo muzej historiske rolnikaŕske rědy. Muzeumowy swěźeń w Błobošojcach zachopijo se witśe zeger 17:00.
***
W Bobowje swěśe witśe (sobotu) tradicionelnu kermušu. Za nju su w tej małej jsy w bórkojskem amśe wjeliki stań natwarili. Zeger 18:00 buźo pśeśěg pśez wjas a góźinu pózdźej śěgnjo ten do swěźeńskego stana, źož swěśe kermušu.
***
Lubinske zmakanje awtorow pśepšosyjo na "nazymsku poeziju". Pótom až su byli ten tyźeń z literarnym programom w Běłej Górje buźo program witśe (sobotu) na "serbskem burskem dwórje" w lubinskim měsćańskim źělom Kamjena/Steinkirchen. Cłonki togo znatego literarnego kluba cytaju ze swójich tekstow a recitěruju basnje, kenž su spisali za nazymu. Mimo togo prezentěruju we małej wustajeńcy mólowanja a grafiki domacnych wuměłcowkow a wuměłcow. "Nazymska poezija" w Kamjenej se zachopijo wótpołdnja zeger 15:00.