W Serbskem domje how w Chóśebuzu jo źinsa slědna góźba se tu wustajeńcu "Serbske krajiny" woglědaś. Wobraze su nastali we źěłaŕnickach a plenairach Serbskeje rěcneje šule. Serbske wjaski, serbske drastwy a nałogi su cesto byli motiw. Źinsa až do zeger 16.30 jo wustajeńca pśistupna.
***
Źinsa, witśe a njeźelu dajo zarědowanja wót interaktiwnego projekta "Serbski kosmos". Pód tym titelom pśepšosyju wuměłski kolektiv SINT, Dolnoserbska kulturna akademija a towaristwo "Studnja" na eksperiment. Pódla budu serbske a nimske performery z muziku, reju, rěcu a wideo. Pśizjawiś musyśo se. To źo pśez mail pód post@sint.zone a pón dostanjośo teke dokradnu adresu.
***
Sobota w slěpjańskej wósaźe wuženu zymu a campruju. W Rownem zmakaju se wót zeger 8.00 na Njepilic dwórje. Pół góźiny pózdźej 8.30 zmakaju se camperaki w Dźewinje pla gósćeńca Köppen.
***
W Bórkowach pśepšosyju na zymske drogowanje. Sobotu wótpołdnja wót napoł dweju wulicuju turistikarje wó adwentnem a zymskem casu we Błotach. Ducy dajo punš abo warjone wino a tradicionelnu jězu móžośo teke woptaś. Kórtki za drogowanje płaśe 12 euro, źiśi mjazy 3 a 10 lětami płaśe 5 euro. Pśizjawśo se pšosym pśi bórkojskej turistiskej informaciji.
***
Starjejše z pśedšulskimi źiśimi mógu se sobotu w Janšojcach we tamnej zakładnej šuli rozglědowaś. Krabatowa zakładna šula pśepšosyjo na źeń wótwórjonych źuri wót zeger 10.00 do 12.00.
***
Njeźelu móžośo se wjaseliś na premjeru serbskego filma. Ten jo nastał za naš telewizny magacin "Łužyca" wót rbb: Gołkojski faraŕ Jan Bjedrich Fryco stoj tam w srjejźišću. Chtož hyšći cwiblujo: droga do Gołkojc na premjeru se na kuždy wupłaśijo! Gaž sćo narske, pón pśiźćo njeźelu do Gołkojc na filmowu premjeru. Ta se zachopijo pó namšy zeger 10:30 we wósadnem domje. Abo wy cakaśo na pśiducy magacin "Łužyca", sobotu, 18. januara film w rbb telewiziji wiźiśo. Tam pšosym glědajśo! Magacin se tenraz južo 10 minutow pó jadnogo (13.10) zachopijo!
***
Nježlic njeźelu w Gołkojcach pó namšy zgónijośo wó statkowanju fararja Frycego, móžośo sobotu wjacor hyšći raz pšawje swěśiś: W Gósćeńcu "K zeleznicy" jo tradicionelny bal w nocnej drastwje. Wót zeger 19.00 źo los, Gołkojski karnewalowy klub wutšobnje pśepšosyjo.
***
W Hochozy jo tu sobotu bal larbow, organizěrowany wót wejsneje młoźiny. W gósćeńcu "K złośanemu plonoju" rejuju te larby wót 19.30, kupka Elektra 68 grajo k tomu muziku. Prědne 3 maski maju lichy zastup!
***
Woklapnicy su ten kóńc tyźenja: Stare lěto woklapuju mjazy drugim źinsa w Dešnje, w "Serbskem dwórje" wót zeger 18.00, w Smogorjowje, we zmakańskem centrumje za młodych a starych źinsa wót zeger 19.00, a we Wjerbnje w hotelu "Ku gwězdźe" teke źinsa wót zeger 19.00.
Wósebnosć jo w Tšupcu: Tam zmakaju se bergarje lětosa prědny raz na wugódnośenje starego lěta a to tu njeźelu wót zeger 15.00. Zmakanišćo jo młyński dom pśi hollandskem młynje.