Pó komunalnych wolbach w juniju zestajiju se gmejnske rady, tak jo se to stało slědny stwórtk teke w Dźěwinje w slěpjańskej wósaźe. Wót tych dogromady 12 cłonkow jo 5 nowych, kótarež kśě se wót něnta za gmejnu angažěrowaś. Šołta Sebastian Bertko jo dał jich pśisegaś a pón su južo ze źěłom zachopili. Wuzwólili su ako zastupnego šołtu Reinharda Holza z Dźěwina, drugi zastupny šołta jo wót něnta Frank Hottas z Brězowki. Toś te wótgłosowanja su byli jadnogłosnje.

W Tšupcu w amśe Górne Błota-Luboraz su měli wuzwólone cłonki za gmejnsku radu južo srjejź julija swójo konstituěrujuce pósejźenje. Do gmejnskeje rady nowo wuzwólona wólarska kupka “Tšupc we wutšobje” źěła tam ze statusom jadneje frakcije. To ma lěpšynu, až móžo sam póžedanja stajiś. A to jo se za pśiduce pósejźenje stało, ako nas wótposłańc a pśedsedaŕ frakcije Manuel Pape informěrował. Frakcija “Tšupc we wutšobje” pomina wót gmejnskeje rady diskusiju a na kóńcu wobzamknjenje, až nastajiju pó głownej droze pśez wjas do lubinskego směra taku toflu, źož mógu šofery cytaś, kak spěšnje su pśez wjas ducy. W Tšupcu su zwěsćili, až jo wjele awtow malsnej ako 50 kilomejtarjow na góźinu. Z takeju elektroniskeju pokazowańskeju toflu mógu šoferow discipliněrowaś. To by dejała gmejnska rada wobzamknuś a trjebne srědki hyšći lětosa do plana stajiś.