+ SLA: Black Friday +
Źinsa jo Black Friday – tune myta, wułapotki wšuder. Napšawdny serbski tip: 8 Euro – tak tunje žednje njedostanjośo kórtku za wusoku kulturu, za koncerty, balett a muzikowe źiwadło. Serbski ludowy ansambl póbitujo jano źinsa kórtki póniźone kórtki za zarědowanja w Decembrje. Na pśikład za chorowy koncert zgromadnje z chorom Dolnoserbskego gymnazija 8. Decembra. Glědajśo, kórtki dajo jano w interneśe pód ansambl.de.


+ SLA: SMY! Bin ich? +
Wobstarajśo se teke slědnu kórtki za premjeru witśe: Pód titelom “Smy! – Bin ich?” insceněrujo lipšćańska choreografowka Gundula Peuthert moderny rejowański kus wó tom co nas wugótujo, kak to jo byś cuzbnik w swójskem kraju, mjeńšyna. Napněta Produkcija bazěrujo na aktualnych interviewach ze Serbowkami a Serbami a pśeźěła teke mjazynarodnu slězynu rejowaŕkow a rejowarjow. Wustajeńca wót Helle Stoletccyc a Karoline Schneider pśewóźujo ewent z kreaitwnymi instalacijami. Witśe 19.30 w Serbskem ludowem ansamblu w Budyšynje.


+ Zarědowanja w adwenśe: Folklora w Slěpem +
Serbske nałogi, drastwa a tradicije w adwenśe prezentěrujo Serbski folklorny ansambl Slěpe. Rědne melodije k sobu spiwanju, reje, slěpjańske dźěčetko a šarmantna moderacija zazneju adwentny cas. Njeźelu zeger 16.00. Kórtki płaśe 10 Euro.


+ Wustajeńce +
Adwent móžośo teke dožywiś ned we wěcej regionalnych muzejach. Dolnołžyski gólanski muzejum dopomnjejo w swójej nowej wustajeńcy na spócety gódownego swěźenja z wjelesymi eksponatami a wuměłstwom. Wótwórjenje jo njeźelu zeger 15.00.

W Łazu zaběraju se ze žłobikami ze cełego swěta. Wustajeńca w domu Zejlera a Smolerja wótwórijo se 14.30.

Pód motom “grajki pód gódownym bomom” pokažo Serbski muzej w Dešnje rědnučke eksponaty z grajkowego muzeja w Kackrowje. Wó pšawu atmosferu stara se chor Łužyca, kenž spiwa wót zeger 15.00 traditionelne serbske ludowe štucki w adwenśe.

Źinsa wótwóriju wustajeńcu w serbskem muzeju w Chóśebuzu. Serbska wuměłcowka Heidrun Bastian prezentěrujo keramiku mjazy modernymi formami a serbskim pismojstwom pód titelom: “We žławach”. Źinsa zeger 18.00 w Serbskem muzeju w Chóśebuzu.


+ Gódowne wiki a druge +
Gódy w žytowem skłaźe z higlightom – swěty Mikławš na cołnje. Tak swěśe prědny adwent w Tšupcu.
Na Šusteroc dwórje w Trjebinje pśepšose na swóje tśěśe gódowne wiki. Program wugótuju mjazy drugim te małke tamneje Lutki-źiśownje. A pjace wót zeger 10.00 fryšny gódowny kołac! Dalšne gódowne wiki wótměju se w Mósće – tam južo witśe, na Lědach dajo wěcej ako góruce wino a cołnowanje. A na wikach w Lubinje móžośo šuflitowaś!

W Błobošojcach prezentěruju se te nejlěpše adwentne wjeńce. Chto dobydnjo, to zgóniśo wót zeger 15.00 wótpołdnja na prědnem adwenśe.

Swětocne adwentne zuki dožywijośo pśi koncerje Kórjeńskego chora w tamnej cerkwi swětego Jana. Njeźelu zeger 17.00.

A w Starem konsumje w Běłej górje wótwórijo se prědne adwentne woknyško, to bužo luštne pśechwatanje!