K 31. decembroju zawrěju wejsnu drogu wót Slěpego do Miłoraza za zjawny wobchad. Pótom pódlejšyju ten wót Trjebina pśiducy šćitny nasyp za slědnymi domami Rownego. Stara wjas Miłoraz jo wót nowego lěta jano hyšći pśez Mułkece pśistupna. Skóro wše wobydlarje su swójo nowe doma namakali. Za tych, kótarychž domy njejsu se dypkownje dotwarili, płaśi nachylny wósebny status.
Wuše zastojnstwo za šćit pomnikow jo LEAG nadawk dało, tśi brožnje w starem Miłorazu pśed wótbagrowanim wuchowaś, wóttwariś a na nowe stojnišća pśesajźiś. Tuchylu su wóni pó pśedpisach za šćit pomnikow składowane a zawěsćone. Nowe stojnišća budu nowy Miłoraz, Njepilic dwór w Rownem a Erlichtowy dwór w Rěčicach.