Serbske žnjowne nałogi dožywiś móžośo sobotu we Mósće. Tamna młoźina łapa kokot.

****

Pětk wjacor buźo w błośańskej bibliotece “Mina Witkojc” w Bórkowach cytanje hochoskego awtora Wolfganga Berga. We knigłach “Wilhelmine – was ich euch noch sagen wollte” stoj jogo starka w srjejźišću. Chuda, ale wjelgin powědata žeńska z Bórkow, kótaraž jo wjele dožywiła, na pśikład ako słužabnica w Brjazynje pla Wackerbarthojc. Ale sama póchada z bogateje familije. Zachopjeńk cytanja buźo zeger 19:00.

*****

Sobotu buźo chóśebuska premjera filma “Ein Feuerwerk für die Kleinstadt”. Film z Grodka jo producěrował Erik Schiesko a se pśedstajijo sobotu zeger 20:00 w chóśebuskem kinje Weltspiegel.

*****

A we Grodku, we tamnem muzeumje, buźo njeźelu wótwórjenje wustajeńcy “Kraj cytanja DDR”. Tam graju nejwoblubowanjejše knigły z casa DDR głownu rolu. Źiwadło k tomu grajo wjacor TheaterNative C z Chóśebuza. We njom cytaju z popularnych knigłow DDR. Wótwórjenje wustajeńcy buźo njeźelu zeger 15:00.

*****

Kněski dom we Łojojcu pla Grodka jo był w 1950ych lětach kino. Njeźelu pokazujo w ramiku muzejoweje nocy wokrejsa Sprjewja-Nysa tam filmowe plakaty a dalšne objekty. Prezentěruju teke historiske fota z Łojojca a sajźaju kafej, tykańc a małe wochłoźeńka. Wót 12:00 do 18:00 buźo wótwórjony.

*****

W Trjebinje buźo njeźelu na dwórje Hanza Šustera muzikaliske dopołdnjo. Z nimsko-serbskeju namšu zeger 9:30 se zachopijo, zeger 10:30 buźo wustup kupki “Pśezpólne”. Zastaraju swójich gósćow ako pśecej z pjaconymy chłošćonkami z pjaca, wót šlachtarja a dalšnych.

*****

W Krabatowem młynje w Čornem Chołmcu prezentěruju njeźelu chory z regiona swójo wuměśe a repertoire. Koncert buźo wót zeger 15:00. Zastup płaśi 3 €. Młyn buźo za regularny woglěd wót zeger 13:30 zacynjony.

*****

Njeźelu zeger 17:00 buźo w rogeńskem parku wótwórjeński koncert źiwadłoweje sezony Statnego źiwadła w Chóśebuzu, zastup jo dermo.

*****

We Picnju buźo ABBA tribute in Symphony, pětk w tamnem hutowem muzeju.

*****

Ten kóńc tyźenja pśewjedu zasej w Błotach drastwiny swěźeń “Drastwa rejujo”. Tenraz w Lubinje, lěpjej gronjone w měsćańskem źělu Lubina Kamjena, nimski Steinkirchen, w znatem gósćeńcu "dom Bórklin". Njeźelu wót zeger 13:00 do 18:00 su žeńske w serbskej drastwje wjelgin witane tam pśiś a, se wě, teke te muske k tomu, kenž z nimi rejuju. Zachopjeńk jo 13:00 nejpjerwjej z namšu w cerkwi w Kamjenej. Pótom buźo drastwiny pśeśěg k rejowanišću a wót zeger 14:30 budu reje. Dajo mlince, łuku za piknik a live-muziku, na pśikład wót Gójackich muzikantow. Budu tam teke wiki drastwinych źělow.

*****

Krajny raźc wót Sprjewja-Nysa, Harald Altekrüger, póbitujo kuždy mjasec kólasowaŕsku turu pśez wokrejs. Pśiduca buźo pla Drjowka. Kólasuju do šćeńcańskeje stupnice – Steinitzer Treppe a do winowego kubła w Klěšniku - Wolkenberg. Tam se wino proběrujo. Dalej do Njamorojc - Illmersdorf, tam woglědaju se cerkwju a rownišćo z mumijami, a na kóńcu jo kafejpiśe na šćeńjańskem dwórje. Pšose wó pśizjawjenja do 3. septembra na www.lkspn.de.