Z nowym mjasecom stej dwě serbskej wuměłskej swětlaka startowałej do noweje sezony: Nimsko-serbske ludowe źiwadło a Serbski ludowy ansambel. Za głowny źěl inscenacijow musyśo drje do Budyšyna abo hynźi do Górneje Łužyce jěś. Z někotarymi serbskimi produkcijami pśiźotej pak teke k nam do Dolneje Łužyce.
Nježlic serbske źiwadło pśiźo do Dolneje Łužyce, musymy hyšći cakaś. W aprylu pokažo w Hochozy muzikalisko-szenisku kolažu wó serbskich wudrogowarjach. Konkretnje źo wó drogowanje Tešnaric familije z Turnowa pśed wušej 175 lětami. Až do Awstralskeje su tegdy drogowali. Co jo jich śěgnuło pśec do dalokosći, co su dožywili na jězbje pśez wjelike mórjo, co su se naźełali w nowej domowni, wó to źo.
Źiśi mógu byś teke napněte. W maju pśiducego lěta wulicuju tšojenje wó Krawlowce barwow. Ta se ze swójimi barwami graka, tak až na kóńcu cełe kralojstwo w šerem wóstanjo. Kak ta kralowka z teje mizery wen pśiźo, to něnt njepśeraźijomy.
Serbski ludowy ansambel pśiźo ned wěcej razow do regiona. Tenraz stoj cela grajna doba ansambla pód motom "Běžy, wóda běžy". Prědna produkcija – "Powědańki wó wóźe" – to jo poetiska inscenacija z baletom, chorom a orchestrom na bazy teksta Jurija Brězana, pśiźo 19. oktobra do Chóśebuza.
Wjacorna ptaškowa swajźba wjeźo nas w januarje pśez tej wjelikej rěce Łobjo a Wołtawa do Pragi na kradu luštnej jězbje z łoźu.
Žornje buźo teke musical za źiśi w januarje pód titelom "Tajny pakčik/Ab geht die Post". Jadno tšojenje wó młodej Hanna a jeje starem nanje, wó źiśecej fantaziji a wó paketach. Zasej raz nowy pśistup k ptaškowej swajźbje. A nic naslědku stoj teke ta błośańska noc powěsćow zasej na planje.
+++