Pětk su w Dešnje woklapali łońske lěto. Jadnab 120 wejsanarjow jo pśichwatało na "Serbski dwór". Z prezentaciju su pśedstajili wažne zarědowanja w zachadnem lěśe, rozsudy a wjeraški we jsy. Teke serbske aktiwity su rolu grali. Pśi tej góźbje su teke zastupniki wejsnych towaristwow powěźeli wó swójom statkowanju. Na woklapnicu stej woglědałej Cathleen Bürgelt – referentka krajnego zagronitego za nastupnosći Serbow a Maja Wallstein zwězkowa wótpósłańcka SPD. Młody šołta Nico Jarik a amtski direktor Tobias Henšel stej pócesćiłej dłujkolětnego dešańskego šołtu Freda Kaisera za jogo pśesegajucu angažěrowanosć a procu z wopismom cesnego wobydlarja jsy. Fred Kajzer jo šołtował w Dešnje skóro 31 lět a za wjas a wobydlarjow wjele wugbał. Wósebnje jo se zasajźił za wejsny muzej.
+++

Nimsko-serbske ludowe źiwadło Budyšyn jo měło łoni 24 premjerow a pó cełem lěśe su zlicyli něźi 125.000 pśiglědowarjow. To jo było 3.000 woglědowarjow mjenjej ako lěto do togo. Nejlěpjej woglědana a z tym nejwuspěšnjejše graśe zajźonych lět jo była prapremjera na głownem jawišću w Budyšynje: "Hercy", kusk wó stawiznach prědneje serbskeje beatband wót Lubiny Hajduk-Veljkovićoweje, jo se woglědało pśisamem 1.700 luźi. Za nejmłodšych pśiglědowarjow jo był "Tśmjel Hana" w Dolnej, Górnej a srjejźnej Łužycy wěcej ako 50 razow pó droze. Lětosa pśiźo Serbsko-nimske źiwadło 26. apryla do Hochoze. Prapremjera změjo titel "Pórajśo se wen do swěta" a wobjadna pśisud serbskich wudrogowarjow do Awstralije a Ameriki.