Mjeńšynowa rada diskutěrowała/Diskussionsrunde des Minderheitenrates
Mjeńšynowa rada jo stwórtk w Budyšynje pśepšosyła na politisku diskusiju. Jano dwě lince w koaliciskem dogronje zwězkowego kněžaŕstwa wó awtochtonych mjeńšynach stej pśemało, tak ten konsens wjacora, měni pśedsedaŕ Domowiny a zastupnik Serbow w tej raźe, Dawid Statnik. Powědali su mjazy drugim wó financach. Wósebnje Frizy trjebaju how wěcej pódpěry. Na komunalnej rowninje źo se Serbam cesto lěpjej ako Sintam a Romam abo Danam. To pódšmarnjo wažnosć komunalnych gremijow za serbske nastupnosći, tak Statnik. Wobźělili su se pódla zastupnikam mjeńšynow politikarje wót CDU, SPD a mjeńšynoweje partaje SSW.
+++
Žylow pśigótujo 725 lět/Sielow wird 725
Žylow pśigótujo se na swój 725. wejsny jubilej. 21. septembra planuju wjeliki swěźeński pśeśěg z wušej 30 wobrazami. Teke serbske nałogi budu se tam prezentěrowaś, groni šefowy organizator Sven Bogacz pětk na info-wjacoru we wejsnem gósćeńcu. Jadnaŕ Domowiny Markus Kóńcaŕ jo gronił, wón ma za derje, až Žylow dalej sebje serbsku tradiciju wažy. Absolwentka Dolnoserbskego gymnazija Mylene Krawcykojc buźo pśeśěg teke w serbskej rěcy komentěrowaś. Wěcej informacijow k jubileju słyšyśo w nowem tyźenju w našom programje.
+++
Krasse Lausitz teke serbski/Kampagne "Krasse Lausitz" auch sorbisch
Hyšći žedne informacije wót zmakanja domowinskeje župy Dolna Łužyca ten stwórtk. Ta pósćelo cłonk pśedsedaŕstwa Šarlotu Kušcyc do strategiskeje kupki za rěcne planowanje. Kupku co wuwołaś Serbski institut, aby pódpěrowała wóžywjenje dolnoserbšćiny. To dajo k wěsći župan Michael Apel. Jogo samego su wuzwólili ako domowinskego zastupnika we wuběŕku za socialne nastupnosći a mjeńšynowe pšawa w Chóśebuzu. Dalej informěrujo Apel, až dajo skóro za imageowu kampanju "Krasse Lausitz" dolnoserbski pśełožk. Kampanja co pozitiwne wuwiśa w strukturnej změnje widobnje cyniś.
+++
Wěcej mjenjow pśistupnych/Sorbische Namensforschung
Serbski institut wobogaśijo swóje póbitowanja na portalu dolnoserbski.de. Wótněnta móžośo pla 50 dalšnych serbskich městnowych mjenjow zgóniś, wótkul jich mjenja pśidu. Dalej dajo nowe informacije k serbskemu póchadoju 500 městnowych abo pólinowych mjenjow. Móžośo to wšo teke na interaktiwnej kórśe sebje woglědaś.
+++
Spominali na kóńc wójny/Gedenken an Kriegsende
W Běłej Górje su wejsanarje spominali na 80. wrośenicu dnja wulichowanja wót nacionalsocializma a drugeje swětoweje wójny. Organizěrowała jo spominanje źěłowa kupka za wejsnu historiju pód nawjedowanim Moniki Schernikau. Wóna ako teke šołta gmejny Běła Góra/Bělin, Romeo Buder, stej dopominałej na tšojenja tencas we jsy a we wokolnych jsach. Teke druge pśibytne su wulicowali, co su ze swójich familijow z togo casa słyšali wó slědnych wójowanjach a kak su luźe wuběgnuli a wuběgańce z drugich regionow pśišli. Wugronili su wše pśibytne swóje starosći, až wobstoj južo zasej tšach pśed noweju wójnu glědajuce na wobronjenje w kraju.