Šesć pśedewześow jo se pětk z Mytom pśichoda Bramborskeje wuznamjeniło. Wšykne mytowane su jury ze swójimi wósebnymi wugbaśami za bramborske góspodaŕstwo pśeznanili. W Dolnej Łužycy jo lawreat AMS Alteno gmbh we Łukowje z 25 pśistajonymi, drugi zawod jo ERIDES gmbh z Mósta. Zawod we Łukowje jo dodawaŕ za wjelikego zgótowarja kranow a zgótujo mimo togo zwigowańske pśipšawy za cołny. Erides gmbh z Mósta źěła we wobłuku wótwardowańskego a běrowowego wugótowanja. Dobywarje Myta pśichoda stoje za wósebne wugbaśa we wukubłanju, pśi naslědnistwje, we wobchadanju z inowacijami a sobuźěłaśerjami.

*****

Depsk jo sebje wudobydnuł prědne městno we wuběźowanju „Naša wjas ma pśichod“. Za to jo měsćański źěl Chóśebuza dostał 10.000 euro, pśepódany srjodu na pósejźenju měsćańskego parlamenta. Cesćiła jo jury wósebnje aktiwne žywjenje we wejsnej zgromadnosći. Tak su sebje wutwarili staru šulu. Mimo togo su sebje depšćanarje wědobnje swójeje ekologiskeje zagronitosći. Druge a tśeśe městno stej sebje wudobydnułej Rogozno a Kórjeń. Pśiduce wuběźowanje buźo za tśi lěta.

*****

Krajna cerkwja za Barliń a Bramborsku jo měła cora synodu, to groni pósejźenje krajnego parlamenta cerkwje. Tam su wobzamknuli, až kśě na rowninje wósadow ze wšyknymi cłonkami cerkwje do kontakta pśiś - teke z tymi, kenž njechójźe na cerkwine zarědowanja, ale weto cłonk cerkwje su. Kak toś ta iniciatiwa se pśesajźijo, budu diskutěrowaś we wósadach. Dalšne wažne wobzamknjenje jo, až we wósadnych radach mógu teke młode luźe wót 16 lět sobu źěłaś. Take něco su w slědnem casu na probu cynili a něnto pśewzeli ako kšutu regulu bźeze casowego wobgranicowanja.

*****

Angelika Balzkowa z Trjebina, Inga Mušalikowa ze Slěpego a Roland Lysk z Trjebina su nejlěpjej zwarili serbsku swajźbaŕsku pólewanku. Wóni su dobyśaŕje w južo tśeśem waŕjeńskem wuběźowanju domowinskeje župy „Jakub Lorenc-Zalěski“. Dogromady jo se 10 žeńskich a jaden muski ze jsow slěpjańskeje wósady wobźěliło. Stwórtk wjacor jo jury w starej šuli w Brězowce wó dobyśaŕjach rozsuźiło.

*****

Wó nałožowanju a wuknjenju serbskeje rěcy w stronach wokoło Mósta kaž teke wo wšakich luźach, kótarež su se za to zazajźili, wó to starali, jo było to grono pětk wjacor w Mósće. Wó tom jo rozpšawił dr. Pětš Šurman wót Serbskego instituta w gmejnskem domje, źož su se zmakali cłonki domowinskeje kupki. Pó pśednosku su powědali wo pśiducych prědkweześach kupki. Tak budu pśiducu sobótu pomógaś pśi wugótowanju 11. gódownego marka we jsy. Coju we wósebnej stojnicy pśedawaś kafej a sam pjacony tykańc. Su ale teke južo glědali na prědkweześa w pśiducem lěśe, źož kśě w maju wóswěśiś 50-lětne wobstaśe mósćańskego serbskego swajźbarskego pśeśěga. K tomu su pśepšosyli mjazy drugim taki regionalny swajźbarski pśeśěg ze susedneje Pólskeje.

*****

Grimotajucy pśiklask a skóro wupśedawany zal: to su mógali cora wjacor dožywiś we Statnem źiwadle Chóśebuz. Zawina za rozbuźenje publikuma jo był jubilejny koncert ku góźbje 60-lětnego wobstaśa dujaŕskego orchestra Chóśebuz. Pód nawjedowanim Markusa Witzsche jo orchester zagrał mjazy drugim někotare z jogo znatych interpretacijow. Srjejź publikuma su sejźeli młoge něgajšne muzikarje, ale teke starjejše a pśiswójźbne muzikarjow na jawišću. Na koridorach su se młoge zasej wiźeli a se zgromadnje dopominali na stare case. Až jo koncert był rownocasnje teke zakóńcenje 50. muzikoweje nazymy, su pśi tom pśisamem zabyli. Wobej instituciji pregujotej lětźasetki dłujko muzikowe žywjenje w Chóśebuzu a cełej Łužycy, na to jo pokazał Hellmuth Henneberg, kótaryž jo koncert moderěrował.