05.09.2024 - Serbske powěsći 5. september / Sorbische Nachrichten
Na swójom drugem pósejźenju pó komunalnych wolbach w juniju jo wokrejsny sejm Sprjewja-Nysa cora wuzwólił cłonki dogromady 8 wšakich wuběrkow a za dalšne gremije, w kótarychž dej byś wokrejsny sejm zastupjony. K nim słuša teke wuběrk za serbske nastupnosći, kótaryž jo jadnučki swójogo raza we wšych nimsko-serbskich wokrejsach w Dolnej a Górnej Łužycy. Do njogo słuša 5 pórědnych cłonkow sejma, 5 zastupnych a 5 wěcywustojnych wobydlaŕjow. Wót frakcije AfD, ako jo ze 19 cłonkami nejwětša we wokrejsnem sejmje, su to Frank Meyer a Frank Henschel, wót CDU Julian Brüning, wót lichych bergaŕjow Hendrik Schulz a wót SPD Guido Kabiš. K jich 5 zastupnikam słušatej mjazy drugimi Fred Kaiser z Dešna a Siegbert Budischin z Bórkow.
Ako wěcywuznate wobydlaŕje su se cora wuzwólili Undine Stöckertowa, Silva Oehlertojc z Janšojc, Astrid Šramina z Gołbina, Birgit Kaufholdowa a Alina Bzdakowa. Domowinu zastupujo w toś tom wuběrku Karin Tšukowa z Dešna. Serbski wuběrk nawjedujo Frank Meyer wót AfD, kótaryž źěła pla zwězkoweje policije. Prědny raz buźo serbski wuběrk zmakaś 25. septembra.
+++
Serbski faraŕ Adam Bogachwal Šěrach by kradu źinsa měł swój 300. narodny źeń. Wón jo rowno tak był nejwětšy slěźaŕ na pólu pcołkaŕstwa we 18. stolěśu a jo publikacije spisał wó tom.
Sobotu, 7. septembra, buźo spomnjeńske zarědowanje w Budyšynku/Klein Bautzen, źož jo źěłał a statkował. Planowany jo wót gmejny Malešecy, wósady a Šěrachowego pćołkojskego towaristwa stajenje pomnika za wuznamnego faraŕja a slěźarja. Zajmne informacije namakaśo w interneśe pód adresu schirach-bienengesellschaft.de.
Zajmne wusćełanje wó pcołkaŕstwje we Łužycy a Šěrachu móžośo w našej mediatece w rubrice "Tematiske słowne wusćełanja" słuchaś.
+++
Nowe wudaśe telewiznego magacina "Kontraste" wót rbb pśiźo źinsa wjacor zeger 21:45 w ARD. Nejwažnjejšej temje buźotej wuzwólowanja za bramborski krajny sejm za dwa a poł tyźenja a za zwězkowy sejm pśiduce lěto. Buźo w Bramborskej teke AfD pó procentach nejmócnjejša resp. druga nejmócnjejša partaja, tak ako w Durinskej a Sakskej? Filmowali su žurnalisty za to pśed dwěma tyźenjoma w Janšojcach a Dešnje, ako stej byłej we wobyma jsoma wjelikej swěźenja. W Dešnje su se zmakali z pśedsedaŕjom Domowiny, Dawidom Statnikom. W Janšojcach, źož jo był wjeliki swěźeń dujaŕskeje muziki a źož su licyli 2.500 woglědaŕjow, su filmaŕje se zmakali ze Susannu Seng, młodeju wótpósłańcku za CDU.