Frank Meyer wót frakcije AfD buźo pśedsedaŕ serbskego wuběrka we wokrejsu Sprjewja-Nysa. Tak stoj w pśedłoze k wobzamknjenju za wokrejsny sejm. Wót nagromady 5 cłonkow wuběrka stej 2 wót AfD a jaden wót CDU, Frakcije Liche bergarje a SPD. Serbam znate mjenja we wuběrku su wót SPD Guido Kabiš z Bórkow, jogo zastupnik buźo Siegbert Budyšyn z Myšyna. Fred Kaiser z Dešna, kenž jo był wjele lět pśedsedaŕ wuběrka, jo zastupnik za pórědny cłonk wuběrka wót CDU Julian Brüning. Dalšnej pórědnej cłonka stej Hendrik Schulz za frakciju Liche bergarje a Frank Henschel za AfD. Pśedsedaŕ wuběrka Frank Meyer wót AfD jo policist a njejo doněnta pla Serbow znaty. Wěcywuznate bergarje su Silva Oehlertojc, Astrid Šramina a Birgit Kaufhold. Rosi Tšukowa jo za Domowinu póraźujucy cłonk wuběrka.
Wokrejsny sejm Sprjewja-Nysa wobradujo 4. septembra a buźo toś tu pśedłogu nejskerjej tak wobzamknuś. Termin za prědne pósejźenje serbskego wuběrka njejo doněnta znaty.
+++
Wuśe sirenow ako test funkcije buźo wótněnta zasej kuždu srjodu we kuždem źělu Chóśebuza. To jo wózjawiło měsćańske zastojnstwo. Su w slědnych mjasecach wšykne sireny na nejnowšy staw spórali, teke wopowěsći su pśez sireny něnto móžne. 17 sirenow dajo nagromady w Chóśebuzu, a kuždu srjodu zeger 15:00 zaricajo wótněnta zasej we kuždem měsćańskem a wejsnem źělu ako test funkcije.
+++
Pśigłosowanje k wuznamoju serbskeje rěcy a kultury a wužywanju serbskeje rěcy w zjawnosći jo w Górnej Łužycy pśiběrało. To jo wuslědk napšašowanja sakskeje imagoweje kampanje "Sorbisch? Na klar.". 87 procentam napšašowanych jo było wažne, serbsku rěc zachowaś. To jo sedym procentowych dypkow wěcej ako łoni. Teke akceptanca za wužywanje serbskeje rěcy jo se pitśku pówušyła. 41 procentam w serbskem sedleńskem rumje a 28 procentam we wokolnych gmejnach jo spódobne, gaž se w jich pśibytnosći serbski powěda. To su tśi respektiwnje styri procentowe dypki wěcej. To pak teke groni, až wětšyna to dalej negatiwnje zacuwa, gaž se w jich pśibytnosći serbski powěda. Cełkownje jo se pśisamem 1.800 luźi w Górnej Łužycy na napšašowanju k swójomu nastajenju k serbskosći wobźěliło. Imagowu kampanju "Serbski? Na klar." co Sakska dalej wjasć.
+++
Južo něnto dejśo se procowaś, gaž cośo na Zelenem tyźenju 2025 něco za Bramborsku prezentěrowaś. Slědny termin za pśizjawjenje jo 4. september. Wó tom informěrujo ministaŕstwo za rolnikaŕstwo. Pśizjawiś mógu se wjelike a małe pśedwześa a rowno tak póbitowarje na pólu gastronomije, dowola, lichego casa a teke wokrejse, zwězki a komuny. Lětosa jo było 275.000 woglědarjow na Zelenem tyźenju. Pśiducy buźo znowa wót 17. do 26. januara.