We wjelikej gmejnje Gołkojce su sobotu swětosnje wótwórili tu nowu cełkownu šulu. Pśed prozinami su juž na probu tam wucyli, ale něnto startujo ten pšawy wšedny źeń. 374 źowćow a gólcow tam wuknjo. 5 rědownjow su jano we 7. lětniku wótwórili. Napšašowanje za teju noweju šulu jo pótakem wjelike. Něźi 60 procentow wuknikow pśiźo z wokrejsa Sprjewja-Nysa, te druge su z Chóśebuza. Cełkowna šula - to groni, až mógu wukniki, kenž to kśě, na tej šuli teke swóju abituru gótowaś. Mógu wóni teke serbski wuknuś? Hyšći feluju ceptarje za pšawidłownu wucbu, tak až dajo nejpjerwjej źěłowu kupku za serbšćinu a Dolnoserbska kulturna akademija co wšake zaběry ze serbskeju kulturu a drastwu póbitowaś.
+++
SERO jo nimska skrotconka za sekundarne surowizny. SERO-Łužyca jo mě nowego zawoda LEAG, kenž jo pó połlětnem probowanju zachopił źěłaś. Nadawk zawoda jo, twaŕske zbytki ako beton, druge materialije a wótpadanki tak pśeźěłaś, až mógu se zasej wužywaś abo fachowje wótpóraś. Złamany beton na pśikład tak pśeźěłaju, až mógu za produkciju nowego betona zasej wužywaś. To samske płaśi za stary šoter, kenž pśiźo pó wobźěłanju a rěšenju zasej do kólejowego pódłožka. Z nowym zawodom jo nastało 20 nowych źěłowych městnow w ramiku strukturneje změny. Bramborski ministerium za góspodaŕstwo a energiju jo załoženje spěchował z něźi 4,9 milionami euro.
+++
Ze spiwami ako "Anka buź wjesola", "Daj mě jedno jejko" a drugimi jo 5 spiwarjow kupki Pśezpólne rozwjaseliło publikum cora na Šusteroc dwórje w Trjebinje. Tamna domowinska kupka jo luźam zbliska a zdaloka kazała na muzikaliske wótpołdnjo pśi góźbje 114. pósmjertnego narodnego dnja ludowego muzikarja Hanza Šustera. Dopołdnjo jo se zachopiło z nimsko-serbskeju namšu. Za śělne derjeměśe su se starali z klěbom a tykańcom ze starego pjaca a z typiskimi serbskimi jězami, wó kótarež su se Starikowe a Lyskowe starali.
+++
Z nowym šulskim lětom w Bramborskej zachopijo se teke nazymski semester na Šuli za dolnoserbsku rěc a kulturu. Plan zarědowanjow wobpśimjejo zasej šyroko paletu kursow a temow. Mimo rěcnych kursow za serbsku rěc za zachopjeńkaŕje a pokšacane buźo ceły rěd pśednoskow, źěłaŕnjow, nałogow a kursow za woplěwanje serbskich drastwow. Taki zachopijo se źinsa w Heincojc šlodaŕni w Žylowje za wušywanje. Witśe buźo prědny online-kurs za nawuknjenje serbskeje rěcy, a to za zachopjeńkaŕje.
+++
Swójo wjasele a kreatiwne dopórucenja su měli źiśi z Lubina a wokoliny w lětosnem lubinskem źiśecem lěśu. Wugótowaŕje su dejali swóje kapacity rozšyriś, dokulaž jo był zajm wó wjele wětšy ako wócakany. Tak jo se prědny raz wobźěliła błośańska gjarncaŕnja Sander z Lubina. Teke muzej grod Lubin jo swóje źurja wótcynił za źiśecu zaběru. Wšykne zarědowanja – ako pytanje za pókładami a zaběru z eksponatami – su byli pśecej połnje wobsajźone. Wugótowaŕje su se dla togo rozsuźili, taku zaběru znowa w lěśojskich prozninach zasej dopórucyś. Planowane jo lubinske źiśece lěśe wót 14. jujila až do 29. awgusta.
+++
Powěsć w swójskej nastupnosći: našo rbb-studijo Chóśebuz ma nowu wjednicu. Jo to žurnalistka Sandra Fritšowa, kótaraž jo swójo powołańske źěło ako moderatorka a powědaŕka powěsćow pśi nimskem programje Antenne Bramborska w Chóśebuzu zachopiła. Potom jo pilotowe wopismo gótowała a jo była někotare lěta lětaŕka za wobglědowanje a znatecynjenje wobchada na awtodrogach a drogach w Bramborskej. W chóśebuskem studiju jo něnto za něźi 50 sobuźěłaśeŕki a sobuźěłaśeŕjow zagronita, kótarež producěruju programy za rozgłos, telewiziju a online w nimskej a serbskej rěcy. Doněntejšna wjednica, Angelika Jordan, jo se slědny pětk na wuměńk pódała.
+++