Za wólby Serbskego sejma su 30 kandidatow a kandidatkow naraźili. To jo zdźělił wjednik wólbow Siegfried Kühn našym kolegam wót mdr. Cas za zapódaśe naraźenjow jo se zajźony pětk skóńcył. Sedym górno- a dolnoserbskich zjadnośeństwow jo kandidatow naraźiło. Wólbna komisija pśespytujo něnto zapódane pódłožki a wózjawijo je 29. nowembra. Zachopjeńk januara rozpósćelu prědne wólbne pódłožki južo registrěrowanym wólarjam a wólaŕkam. Paralelnje k tomu mógu se dalšne wólarje až do 23. februara za wólby Serbskego sejma pód: serbski-sejm-2024.de pśizjawiś.

*****

Sobotu jo se wótměł w budyšyńskej měsćańskej hali "Krona" 150. górnoserbska schadźowanka. Wósebnosć lětosneje schadowanki jo była moderacija. Absolwenty jubilejnych lětnikow z někotarych lětźasetkow su wjadli pśez program. Pśisamem 450 woglědowarjow jo dožywiło pśinoski wuknikow Serbskego gymnazija, studentow z Drježdźan a Lipska, kolektiwa Serbskeje murje, něgajšnych studentow a drugich. Mimo togo su wustupili chor studentow a wšake śělesa 1. Serbskeje kulturneje brigady a pó programje jo grała kupka "Horjany" k rejam. Teke satiriski casopis "Šeršeń" su studenty zasej pśedawali.

*****

W kompjuterowem muzeju Konrada Zusego we Wórjejcach jo projekt Drastwa Digital njeźelu pśewjadł swój prědny workshop. Tam su pśedstajili zajmcam procese a techniki za digitalizaciju serbskich narodnych drastwow. Teke swójske źěle serbskeje drastwy su mógali gósći sobu pśinjasć, aby je zascannowali. Za znowa su dalšne zarědowanja w Górnej a Dolnej Łužycy planowane. Nastaś dej digitalny archiw za dokumentěrowanje serbskeje drastwy, kenž jo teke wótwórjone za wšakorake dalej wjedujuce nałožowanja.

*****

Pśi wójowanju pśeśiwo afrikańskeju swinjeceju mrětwu wiźi se wokrejs Sprjewja-Nysa pó dobrej droze. Jo se raźiło, zwěrjecu mrětwu pódpołnocnje awtodrogi 15 wutupiś. To jo wokrejs pětk pisnje zdźělił. Togodla se něnto šćitna cona 2 pómjeńšyjo a źěle prědneje cony wótpóraju. Šćitny koridor do Pólskeje a strony pódpołdnjowje awtodrogi wobstoje nejpjerwjej raz dalej.

*****

Jano hyšći až do srjody, 27. nowembra, mógu se luźe w Trjebinje pśizjawiś za pjacenje kołacow/krystbrota. Prědny adwent co tamna domowinska kupka zatopiś historiski pjac na Šusteroc dwórje. Chtož ma zajm, móžo se telefoniski až do srjody pśizjawiś pla pśedsedaŕki Angeliki Balckoweje w Trjebinje.