26.08.2024 - Serbske powěsći wót 26. awgusta / Sorbische Nachrichten
Cora jo na 30. Domowniskem a drastwinem swěźenju bórkojskego amta śěgnuł dłujcki pśeśěg pśez Dešno. We 50 wobrazach su jsy a gmejny amta pokazali na wjelerake žywjenje a statkowanje źinsa a we zachadnosći. Dešno, kótarež jo rownocasnje swěśiło swój 575-lětny jubilej, jo se prezentěrowało w cełej šyrokosći. Prězy jo kšacał dłujkolětny šołta Fred Kaiser pśedrasćony ako historiska póstawa Wedigo von Kottwitz – krajny bogot w 15. stolěśu. Źiśownje, šule a horty w bórkojskich jsach nałožuju serbsku rěc, domowinske kupki abo wejsne tradiciske abo drastwine towaristwa woplěwaju serbske nałogi a tradicije.
W pśeśěgu su pśedstajili, kak su w zachadnosći źěłali na roli, lěc pśi žnjach abo młośenju a kak su połdnjo na póli pójedankowali. Ale teke pśezpołdnica njejo felowała. Teke domacne źěło sy dožywił, na pś. pśi pałkanju, dojenju krowy a librowanju mloka. To cerkwine njejo felowało w pśeśěgu. Sobu śěgnuli su jatšowne spiwaŕki z Dešna a fararje.
Do wócowu jo biło bogatstwo serbskeje drastwy, kótaraž jo se pśedstajiła we wšakich wariantach. Wót źěłoweje, pśe namšaŕsku až k swěźeńskej. Pyšne wušywanki, na cypjelach a šorcach su pokazka na rolu burskeje drastwy na jsach. A se wě sportowe abo stśelcowe towaristwa, jagarje, rybakarje abo wognjowa wobora su byli zastupjone. Žedne wobraze su dopominali na stawizny regiona, na pś. załoženje a wobsedlenje Kupaŕskich Bórkow pśed 300 lětami abo wudrogowanje Wjerbanarjow do Australskeje a połdnjoweje Afriki we 19. stolěśu.
Teke druge jsy su byli w pśeśěgu pódla ako gósći, na pś. z Lubnjowa, Raduša abo Strobic a samo drastwina kupka z Hamburga.
+++
Łužyski festiwal / Lausitz Festival 2024
Wustajeńcu z titelom "Njewěste dotyknjenje" wuměłcowki Helle Stoleccyc su cora w Chóśebuzu wótwórili. Wótwórjenje w Bramborskem krajnem muzeju za moderne wuměłstwo (BLMK) jo był rownocasnje kooperacija z Lausitz festivalom a jo było zachopk programa festiwala w Bramborskej. Za 28-lětnu Hella Stoleccyc jo toś to rozpokazowanje swójich twórbow w muzeju BLMK wažny mrocnik w swójej karjerje.
Mimo tamnjejšeje prezentacije 30 mólbow pokazujo galerija "ma/rie/mix 23" w Chóśebuzu komplementarnu wustajeńcu. Pód titelom "We wašych zagrodach" prezentěruju až do srjejź nowembra kreslanki wót Helle Stoleccyc.
Wustajeńcu "Njewěste dotyknjenje" w BLMK móžośo se až do 13. oktobra woglědaś. Wótpowědny katalog wustajeńce w serbskej a nimskej rěcy jo Załožba za serbski lud ze spěchowanim zmóžniła. Publikaciju dostanjośo pśi kupjenju zastupneje kórtki za wustajeńcu.
+++
Publikumowy magnet jo był 13. janšojski dujaŕski swěźeń cora na wejsnej łuce w Janšojcach. Ako moderatorka jo nawjedowała Jasmin Schomber-Krausowa suwerenje a šarmantnje pśez wěcej ako źewjeś góźinow trajucy wótměnjaty program pěśich kapałow. Z wjasołeju muziku jo dała pólska měsćańska kapała z Iłowy zachopk, spśijaśelona z janšojskimi dujaŕskimi muzikantami južo wót lěta 2006. Slědowałej stej janšojski žeńskecy chor a muskecy chor "Wjasołosć", kótarejž stej zagóriłej ze serbskimi a nimskimi ludowymi spiwami pód režiju Geralda Šejna. Pśi zukach janšojskich dujaŕskich muzikantow jo se śěgnuło wjele rejowarjow pśed jawišćo a tak jo wóstało cełe wótpołdnjo a atmosfera jo dojśpiła swój wjerašk pśi wustupje stargósća Ross Antony z Wjelikeje Britaniskeje.
+++
Južo sobotu jo se wótměło w Janšojcach na swěśenišću pśi Pušćalnicy žnjowny swěźeń. Z 33 stopnjami jo to było wósebne wupominanje za tych 8 rejtarjow ze swójimi kónjami, ale teke za tych 13 źowćow we swójej swěźeńskej drastwje a za Lutzetalskich dujaŕskich muzikantow. Žnjowny kral bu pó śěžkem wójowanju Noah Rex ze žnjowneju kralowku Marie Gerwichojc, druge městno jo se wudobył Leon Pursche z Annu Starikojc a tśeśe městno jo sebje wuwójował Tamino Krokor ze Sinu Rosinscyc. Teke janšojska młoźina njejo se zwěriła tradiciju karowanja žabow dalej wjasć. Město togo su źowća se wuběźowali we karowanju walikow słomy. Pśi běgu wokoło wrotow ze tśimi walikami słomy na karje su se wuběgowali wó spěšnosć.
+++
"Naš kraj - Unser Land?"
Sobotu su grali w ramiku Domowniskego a drastwinego swěźenja w Dešnje źiwadłowe graśe "Naš kraj – Unser Land?". Jo se tam jadnało wó pšašanje, komu słuša kraj Łužyca. Interaktiwne graśe jo wobswětliło ze wšakich perspektiwow toś to pšašanje. Wokoło 30 luźi jo se graśe woglědało, financěrowane wót Załožby za serbski lud.