+ Nowa koalicija w Bramborskej stoj
Buźo w nowem koaliciskem dogronje partajowu SPD a BSW teke to grono wó mjeńšynach a Serbach? Na to se naźeje zastupniki Serbow. Serbska rada w Bramborskej pokažo na nejwětšy nadawk w pśiducem casu – na stwórjenje studiuma serbskego ceptaŕstwa w kraju. Za wótpowědny studium w Złem Komorowje njejo stare kněžaŕstwo až do kóńca žeden jasny politiski signal dało. Dalej trjebaju Serby pódpěru wót kraja pśi wuwójowanju Serbskego sedleńskego ruma. Koaliciske dogrono se źinsa wótpołdnja pśedstajijo. Nowe kněžaŕstwo změjo jano wusku wětšynu w parlamenśe. Prědk wezeło jo se mjazy drugim mjenjej běrokratije, źaržanje chórownjow a se wugroniło pśeśiwo pówušenju rozgłosowego pśipłaśonka.
Update (15.00): Pó źinsa pśedstajonem koaliciskem dogronje cotej se SPD a BSW za to zasajźiś, až dostanjo Załožba za serbski lud “dosegajuce financěrowanje”. Dalej cotej “Sorabistiku na BTU Chóśebuz-Zły Komorow zmócniś”.


+ Archeogenetika a Serby
Slěźarje su wobkšuśili, až su Serby pśed lětstotkami drogowali z pódzajtša do Łužyce. Prědny raz jo wó tom Serbski rozgłos pla MDR rozpšawił a se póśěgujo na rezultaty slěźenja Maks-Planck instituta za ewolutionarnu antropologiju z Lipska. Te su se cora pśedstajili w zarědowanju Maćice Serbskeje w Budyšynje. Tak pomjenjona archeogenetika jo pó analyzy cłowjeskich kóstkow wunamakała, až jo wobydlaŕstwo pó śěstem stolěśu w pódzajtšu Nimskeje jasnje hynakše ako do togo. Jěsnjejše wobydlarje su skerjej pśišli z Dańskeje abo Niźozemskeje. Teke pla źinsajšnych Serbow w Łužycy su zwěsćili až se geny až na 80 a 90 procentow makaju ze Słowjanami w pódzajtšu. W Lipsku jano hyšći 40, w pódwjacorje hyšći mjenjej. Zakład togo slěźenja su byli chórobne daty nanejmjenjej 1000 Serbow.


+Inwestěruju we Wochozach
We Wochozach se skóro zasej twari: gmejna jo spěchowańske srědki za zmakanišćo „wejsny kružk/Dorfkrug“ dostała. Financielne pśipłaśonki pśidu z programa Leader za łužysku jazorinu. Za saněrowanje starego twarjenja pódla sportnišća jo něźi 200.000 euro trjebnych. Tśi běrtyle sumy se ze spěchowańskimi srědkami nałožyju. Za planowany fotowoltaikowy załožk ma se gmejna pak wó wósebne srědki procowaś. Saněrowanje wejsnego centruma jo do nowembra 2025 planowane.


+Wjelk w Chóśebuzu
Pśecej zasej jo był wjelk w chóśebuskej wokolinje wiźeś. Něnt jo znate, až jo pópadnuł prědne zwěrjeta. A to w Chóśebuskem zwěrjeńcu. Jadna se wó dwě sobje. Nejskerjej jo wjelk teke wšake sarnje w parku sprjewinego ługa pópadnuł. Wósebnje w pódpołdnju města su pasanty to zwěrje wiźeli. Eksperty wuchadaju z togo, až jadna se wó młodego wjelka. Eksperty pak wobtwarźiju, až luźe njemuse měś tšach pśed wjelkami. Normalnje wóni se cłowjekam wobijaju.


+Namakali fota Trstenjaka
Pśechwatajuca namakanka: Historiske wobraze wuznamnego słowjeńskego molarja Anta Trstenjaka su se nowo nadejšli. Ako Serbski institut zdźěli, su starcyli na nje pśi digitalizaciji fotografiskego fundusa Serbskeje filmoweje kupki w Serbskem kulturnem archiwje. Jadna se wó carno-běłe fotografije, ako su wuměłcoju pomagali pśi stwórjenju swójich mólbow. Na nich su wiźeś zwětšego serbske drastwy wšakich regionow. Wósebnje za historikarjow jo, až su teke mjenja wótmólowanych pśipisane. Trstenjak jo był w 20tych lětach wěcej razow w Łužycy. Zběrka buźo skóro we fototece sakskeje krajneje a uniwersitneje biblioteki (SLUB) pśistupna.