Na pśepšosenje Heika Kozela, powědarja starjejšych wuknicow a wuknikow Dolnoserbskego gymnaziuma, su se cora zmakali wósoby, kenž se wuznaju a maju nazgónjenja na pólu serbskego kubłanja. Su wobradowali wó skšuśenju serbskego profila šule.
Za tym, ako jo se to tematizěrowało na šulskej a starjejšyńskej konferency lětosa, su starjejše, wukniki a absolwenty gymnazija zapódali wušej 80 naraźenjow. Mjazy drugim źo pśi tom wó wabjenje za šulu ze serbskim profilom, serbsku rěc za wšednu komunikaciju teke zwenka wucby, kooperaciju z drugimi kubłanišćami a serbskimi institucijami, ze słowjańskimi a mjeńšynowymi šulami, ako teke wó kubłańske serbskorěcne a kulturne pórucenja za starjejšych. Na corajšnem wobradowanju su powědali wó dalšnych kšacach, aby se naraźenja rozwažyli a dalej dali.

*****

Comicowe kniglicki “Die Lutki” maju wótněnta we wokrejsu Dubja-Błota. Južo wót pónjeźelego su k dispoziciji w drogujucej bibliotece, kótaraž jo ducy z busom. Teke w drugich bibliotekach wokrejsa se póbitujo 12-bocny zešywk, kenž dej se w šulach a źiśownjach rozdawaś. Dwójorěcny comic jo wugótowała lubinska wuměłcowka Karen Ascher, do serbskeje rěcy jo pśestajił Bernd Pittkunings.

*****

Ukrainarje su se zgromaźili sobotu pśed Nimskeju cerkwju w Chóśebuzu, a to pśi góźbje 33. wrośenice wuzjawjenja njewótwisnosći Ukrainy. Kužde lěto 24. awgusta swěśe Ukrainarje źělenje Ukrainy wót Rusojskeje a pśewześe suwerenity swójogo stata. Ukrainske žeńske, muske a źiśi su zachopili swěźeń w Chóśebuzu z tym, až su se wutšobnje wuźěkowali Nimskeje za pśiwześe ukrainskich familijow a pódpěru za Ukrainu we wójowanju pśeśiwo Rusojskeje. Pótom su wšykne spiwali narodnu hymnu Ukrainy a su mjelcali minutu ako wopominanje za Ukrainarjow, kenž su we wójnje žywjenje zgubili. Pótom su swěśili z rejami a spiwami, kótarež su źiśi zgromadnje ze swójimi starjejšymi pśigótowali.

*****

Za fotowy projekt móžośo se pśizjawiś. Jo to projekt zjadnośeństwa nimskich a awstriskich wuměłcowkow GEDOK. A ta GEDOK w Bramborskej co něnto ze žeńskimi we Łužycy wugótowaś fotowy projekt, ako rad ze smartphonom abo ze swójskeju kameru swój wšedny źeń fotografěruju. Wót septembra až do decembra wótmějo se projekt w małych kupkach a z profesionelnymi fotografowkami. Wobźělenje jo mimo kostow! Žeńske w Bramborskej stoje pśed wupominanjami, aby mejstrowali swój wšedny źeń. Cil projekta jo, až jich pótrjeby a perspektiwy se pśedstajiju. Až do 13. septembra mógu se zajmcy pśizjawiś pód foto@gedok-brandenburg.de.