Wót źinsajšnego njejo nuzowe pśiwześe w Gubinskej chórowni wěcej źeń a noc wótwórjone. Klinika jo se rozsuźiła za ten kšac we wobłuku wětšego pśestrukturěrowanja. Za małe chórownje ako Naemi-Wilke-Stift njejo 24- góźinske nuzowe pśiwześe personelnje a financielnje wěcej móžno, jo gronił jadnaŕ Andreas Mogwitz. Dokulaž nejwěcej pacientow wódnjo abo na ranem wjacorku pśidu, su se wótwórjeńske casy wótpowědnje pśiměrili. Wob tyźeń jo nuzowe pśiwześe něnto wót zeger 7:00 do 20:00 wótwórjone. Kóńc tyźenja a na swěźenjach wót 9:00 do 18:00. Wuchowańske awta, kótarež se zwenka wótwórjeńskego casa alarměruju pótom njejědu do Gubina ale do drugich chórownjow.
+++
Zjadnośeństwo serbskich błośańskich rybarjow Bórkowy a wokolina jo se zmakało na lětnu głownu zgromaźinu. Zachadnu sobotu su prědny raz w Prjawozu, w Lukasowem gósćeńcu wobradowali. Zjadnośeństwo ma tuchylu 145 cłonkow w 17 rybaŕskich kupkach we wokrejsoma Sprjewja-Nysa a Dubje-Błota a w měsće Chóśebuz. Wót nich jo se jadnab 120 cłonkow wobźěliło. Wóni su slědk glědali na źěłabnosć zachadnego lěta, mjazy drugim su zasej młode ryby wusajźili. Wěcej informacijow słyšyśo srjodu w našom programje.
+++
Wobswětowa seś Zelena liga jo njeźelu pśewjadła nowolětne drogowanje do Rownego, k wobgrozonej góli pśi wochozańskej jamje. Tam jo swóje planowane zarědowanja 2025 pśedstajiła. Wót apryla změju w góli pla Rownego źiwadło, pěsnikarjow, cytanja, pśednoski a reje. Až do septembra ma se na tom symboliskem městnje raz wob mjasec wuměłske zarědowanje wótměś. Pśeśiwo wuswójenju priwatneje góle dla wugloweje jamy jo wobsejźaŕ pśed Wušym zastojnskim sudnistwom Budyšyn skjaržył. Jolic sudnistwo rozsud górnistwowego amta njewótpórajo, ma se góla k 1. januaroju pśiducego lěta (2026) za dalejwjeźenje brunicoweje jamy Wochozy znicyś.
+++
Lětosa se teke w Dešnje zasej pśěza zmaka. To buźo jadno tych pśedewześow wejsneje domowinskeje kupki. Teke kurs serbšćiny kśě we tom ramiku w nazymje we jsy póbitowaś. Na swójej lětnej zgromaźinje ten pětk su teke glědali na lětosne wjeraški, ako nowo iniciěrowany maskowy bal, bliski muskecy zapust, woglěd serbsko-nimskego źiwadła, a kokot. Wjeliki tema wóstanjo nadalej pśichod domowniskego muzeja. W awgusće źo něntejšna wjednica do renty. Lěc namakajo gmejna alternatiwu za financěrowanje jeje městna, njejo jasne. Aktualnje ma domowinska kupka 41 cłonkow.
+++
Z koncertami w Drježdźanach, Lipsku a Budyšynje ten kóńc tyźenja jo se wótwóriło 30. wudaśe Wósebnego koncerta na progu do nowego lěta. Koncertowy rěd pó iniciaciji serbskeje pianistki Heidemarie Wiesner z Barlinja spěchujo wósebnje serbsku komornu muziku. W běgu casa jo za njen nastało wušej 80 twóŕbow serbskich komponistow, na pśikład wót Detlefa Kobjele abo Jura Mětška. Mjaztym teke nowa generacija komponistow serbske twóŕby za ten koncert stwórijo. Lětosa jo hyšći 4 dalšnych koncertow planowanych, w Chóśebuzu, Delnim Wujězdźe, w Wórjejcach a Barlinju.