Serbska wósada/Wendische Kirchgemeinde | Bild: Konstanze Schirmer

27.10.2021 - Serbski ewangelski kóńc tyźenja we Žytawskich górach

Wót pětka až do njeźele jo se wótměł Serbski ewangelski kóńc tyźenja we Žytawskich górach w Heinewalde na tamnjejšem Eurohof. Pó połtera lěśe su se familije mógali zasej zmakaś k wjasołej serbskej gomaźe, aby spiwali, rozmyslowali, grali a drogowali. Organizěrowało jo kóńc tyźenja Serbske ewangelske towaristwo z jogo pśedsedarjom Matom Krygarjom, póchadajucym z Picnja, a serbska superintendentura ze superintendentom Christophom Rummelom a sobuźěłaśeŕku Dianu Pašcyneju. Pśijěło jo 36 luźi, z togo jo było 22 źiśi a młodostnych wót 9 mjasecow až do starstwa 15 lět. Na reformaciskem dnju, něnto njeźelu, pśepšosyjo Serbske ewangelske towaristwo zeger dweju (14:00) do Ketlic w Górnej Łužycy na swójo lětosne głowne pósejźenje. Cłonki towaristwa a gósći, ako se za serbske cerkwinske žywjenje zajmuju, su wutšobnje pśepšosone.