9. junija wótměju se w Bramborskej komunalne wólby. Wólbne wójowanje jo juž zachopiło. To wiźiśo na plakatach, ako su mjaztym partaje a wólaŕske zjadnośeństwa teke w Chóśebuzu pówjesyli. Mjazy nimi teke plakaty w serbskej rěcy. Na pśikład CDU wabijo jadnorěcnje ze špruchom "tradiciju zdźaržaś". Jaden plakat wubuźijo pak protest mjazy někotarymi Serbowkami a Serbami. Partaja AfD pokažo na njom žeńske w serbskej swěźeńskej drastwje. Pód tym jo cytaś špruch "Unsere Dörfer sind bunt genug!" Za Domowinu jaden nogo. K tomu regionalna powědaŕka za město Chóśebuz Karin Tšukowa:
zuk Karin Tšukowa
("Wiźimy zasej plakaty ze serbskimi drastwami za wólby, tenraz wót AfD za chóśebusku měsćańsku zgromaźinu. Njejo prědny raz, až se naša drastwa instrumentalizěrujo. To smy musali w zachadnosći južo cesćej dožywiś. Źinsa jo tak, až maju luźi w towarišnosći wšake mjenjenja. Wupominanja su dosć. A my Serby njocomy se reducěrowaś daś na drastwu. Wiźimy serbsku rěc a drastwu ako jadnotu. Togodla se wjaselimy, wó kuždy plakat źož wiźimy rozymny wólbny slogan w serbskej rěcy. Lětosa ako prědny wót CDU. Cłonki našogo župnego pśedsedaŕstwa Domowiny w Dolnej Łužycy su plakaty na slědnem pósejźenju 16. Apryla diskutěrowali. Su byli mjenjece, až jo śěžko se woboraś pśeśiwo plakatoju. A teke njekśě AFD do srjejźišća stajiś. Wugronijomy se ceło jasnje pśeśiwo zjawam, źož se wjelerakosć našogo serbskego derbstwa znjewužwa a instrumentalizěrujo za to, aby drugich z našeje towarišnosći wustarcyli.")
Z teju temu se něnto teke prezidium Domowiny zaběrajo. Komunalne wólby w Bramborskej budu 9. junija.