Głowna zgromaźina Maśice Serbskeje / Hauptversammlung der Maśica Serbska
Pětk (19.04.) wótpołdnja zeger tśich (15.00) wótmějo Maśica Serbska swóju głownu a teke wólbnu zgromaźinu, w Serbskem domje w Chóśebuzu. Ako pišo jeje pśedsedaŕ Pětš Šurman, historikaŕ na Serbskem instituśe, w pśepšosenju, kśě swětocnje pśepódaś lětosne myto "Bogumiła Šwjele". Pśedwiźony jo pśednosk mytowaneje wuknice Dolnoserbskego gymnaziuma Lucie Loichenojc. Wóna jo praktikum gótowała pśi Nowem Casniku a wó Nowem Casniku wjele slěźiła. Jeje źěło "Nowy Casnik: cora-źinsa-witśe" na zgromaźinje pśedstajijo. Pó toś tom źělu źo ze zgromaźinu dalej, pśedsedaŕ rozpšawijo wó źěłabnosći wědomnostnego towaristwa a potom budu wólby pśedsedaŕstwa a pśedsedarja resp. pśedsedařki.
***
Kulturny śěg startujo do sezony / Kulturzug startet
Wót Chóśebuza do šlazyńskeje metropole Wrocław trajo jano někak tśi a poł góźinow a to źo nejlěpjej z kulturnym śěgom. Pětk (19.04.) startujo kulturny śěg do sezony. W tom lěśe stoj kulturny program, ak dožywijośo pśi jězbje, pód motom "Tšojenja w brěmjeńkach". Koncerty, cytanja, pśednoski a rozgrona z gósćimi z politiki a kultury stoje na planje. Tiket płaśi 24,90 euro. Zastupiś móžośo w Barlinju, Chóśebuza a Běłej Wóźe. Tip: Gaž maśo Deutschlandticket, móžośo 5 euro žariś. Źiśi płaśe jano połojcu.
***
Serbski telewizny magacin / Fernsehmagazin "Łužyca"
Situacija slěpjańskeje narěcy buźo mj. dr. śěžyšćo telewiznego magacina "Łužyca", witśe (20.04.) zeger 13.35 w rbb programje. Moderator Christian Matthee powěda mjazy drugim z Hanzom Mroskom, ako jo maminorěcny Serb, a z jogo enkelsynom Šymanom Blumom, ako jo se rěc swójogo starego nana pśiswójił a w Serbskem instituśe na tom pólu slěźi. Dalšne temy w magacinje budu wuknikojska firma Dolnoserbskego gymnasiuma, portrej młodego Barlinaŕja, kenž tam bydli a źěła za Serbski institut. A se pšašamy, kak serbske su Lědy. Su typiska błośańska wjas, muzeumowa wjas - ale źo jo napšawdu to serbske? Awtor jo Luka Golinski, kenž wuknjo serbski w projekśe Zorja. Wón jo pśi telewiziji swój praktikum gótował. To a wjele drugego wiźiśo a zgónijośo w aprylskem wudaśu magacina "Łužyca" w rbb na bramborskem kanalu.
***
Serbske wótpołdnjo w Hochozy / Wendischer Nachmittag in Drachhausen
Serbska rěc, serbske reje a muzika na jawišću - to dožywijośo sobotu (20.04.) na Serbskem wótpołdnju w Hochozy. Šula za Dolnoserbsku rěc a kulturu pśepšosyjo wutšobnje. Uta Henšelowa jo zestajiła pyšny program. Serbske wótpołdnjo buźo wót zeger 14.00 w gósćeńcu "K złóśanemu plonoju".
***
Wjasele do rejki w Myšynje / Sorbische Tänze in Müschen
Serbski rejowaś kaž něga raz móžośo pśi rejowańskem wótpołdnju tu njeźelu (21.04.). Pód motom "Wjasele do rejki" pśepšosyjo gmejna w Myšynje wót zeger 15.00 do gmejnskego domu. Njewěsćo hyšći tak pšawje, co z wašyma nogoma zachopiś abo cośo zasej reje rejowaś, ak sćo w młoźinskem casu hyšći znali – Michael Apel was nawjedujo. Kaž pśecej dajo dobry tykańc.
***
Serbski krimi pśiźo do Žylowa / Niedersorbisches Theater in Sielow
Chto jo w Błotach ducy a zagadujo luźi? Pó wuspěšnej premjerje cyni napněty a rozwjaselecy kus Nimsko-serbskego źiwadła "Smjerś pó štuckach" staciju w Žylowje, njeźelu, 21. apryla. Tšojenje bazěrujo na teksće Makusa Końcarja a wulicujo wót źiwnego mordaŕstwa. Skandalnu reportaŕku namakaju njabogu w tšuze pó swajźbje. Kuždy we jsy ma motiw. Chto jo mordaŕka abo mordaŕ, zgónijośo njeźelu w gósćeńcu w Žylowje zeger 17.00. Kórtki dostanjośo pśez internet abo na wjacornej kasy. Dalšnej termina bužotej 4. maj w Radušu a 13. maj w Chóśebuzu.
***
Wustajeńca w Błobošojcach / Ausstellung in Bloischdorf
Cerwjeny swěśecy makowe pólo, we wóleju spórany na płachtu. Wuměłcowka Monika Varga z Grodka stwórijo jadnorazne naglědy łužyskeje domownje. Muzeumowa brožnja w Błobošojcach pśepšosyjo na wótwórjonu wustajeńcu z jeje nowšymi twóŕbami, něnto njeźelu wót zeger 15.00. Za śěło a dušu dajo kafej a tykańc.
***
Casting za Krabatowe graśe / Casting für Krabat Festspiele
Za lětosnu nowo inscenaciju Krabatowych graśow na terenje Krabatowego młyna w Carnem Chołmcu pytaju hyšći komparse/statisty. Premjera noweje episody buźo 19. junija. Lětosne Krabatowe graśa graju 16 raz až do 7. julija. Proby za nowe graśe startuju 13. maja. Gaž ma něchten zajm, raz tam sobu graś, do togo sobu probowaś, móžo se něnto njeźelu (21.04.) w Carnem Chołmcu pśedstajiś. Casting se zachopijo dopołdnja zeger 10.30.
***
Rola Serbowkow w kulturje / Rolle der Sorbinnen in der Kultur
Chtož woglěda sebje kulturny program za ten kóńc tyźenja, jo snaź starcyła pód toś tym titelom jadnogo zarědowanja: Rola Serbowkow w serbskej kulturje. Buźo to filmowy wjacor rozgrono z młodymi Serbowkami w chóśebuskej galeriji Fango, sobotu wjacor 20.00. Pšašaju, kak mógu serbske tradicije se na jadnom boku wobchowaś, na drugem boku teke dalej wuwijaś a změmniś, groni Claudia Arndt, socialna wědomnostnica na BTU a organizatoŕka wjacora. Wóna wótbłyšćujo, což młode Serbowki gronje. K tomu pokažu filma "Pytaś a Namakaś" a "Křižerki".