We slěpjańskej gmejnje planuju zgromadny projekt za alternatiwne zastaranje z energiju a śopłotu. Wětšniki kśě twariś a składy za śopłotu a slědkoju natwariś energijowe drustwo za wobydlarjow. Prědne 4 wětšniki kśe w pśiducem lěśe twariś na wusokem wótsypowanišću w Mułkojcach. Pózdźej deje hyšći dalšne 21 załožki k tomu pśiś a dogromadu 167 megawatt miliny producěrowaś, jo rozpšawił zagronity zawóda enercity na bergaŕskej zgromaźinje. Wót financielnych nabrankow dej teke gmejna něco dostaś a by mógali se towaristwa we gmejnje spěchowaś.
+++
Droga mjazy Bobowom a Myšynom, ako jo wušej dwa kilomejtarja dłujka, dej se w lětoma 2024 a 2025 docełego nowo twariś. Wokrejs Sprjewja-Nysa co za to wudaś jadnab 1,2 milionow euro. To su cłonki wokrejsnego sejma něnto wobzamknuli. Bramborski ministaŕ za wobchad, Rainer Genilke, pśepódajo za tu twaŕ pśiducu wałtoru spěchowańske srědki wót kraja, rowno tak za wobnowjenje mósta pśez brusnu groblu mjazy Drjenowom a Hochozu.
+++
Hanzo Wylem-Kell, cłonk Serbskego sejma, kandiděrujo ako jadna z dwěju wósobowu za AfD pśi wólbach za měsćańsku zgromaźinu Wětošow. To jo rozpšawił ten tyźeń serbski wjacornik Serbske Nowiny. Kell pak njejo jadnučki Serb, kenž za AfD nastupijo pśi komunalnych wólbach 9. junija. Mjazy drugimi kandiděrujo skótny gójc Ulrich Wünsch z Rogozna za chóśebuski měsćański parlament a w janšojskej wejsnej raźe jo něnto južo něgajšny kjarcmaŕ Fryco Krawc za AfD z cłonkom. Wón lětosa zasej kandiděrujo, gromaźe z Lotharom Krawcom.
+++
Něnt jo jasne: 31. awgusta togo lěta buźo se nowa moderna cełkowna šula na teritoriumje gmejny Gołkojce blisko Hajnka (Kolkwitz-Hänchen) oficielnje wótwóriś. Wšykne zbytne twaŕske źěła w twarjenju a zwenka njogo derje bulaju. Termin njejo w tšachośe, jo se groniło na pósejźenju wokrejsnego sejma slědnu srjodu. Wót tych 28 wšakich firmow, ako su tam źěłali abo dalej źěłaju, su 24 domacne, z wokoliny, což jo chwaliła rucnikaŕska komora Chóśebuz.
+++
Łužyskim rucnikarjam se zwětšego derje źo, to gronje nanejmenjej 70 procent. To jo wuslědk nalětnego napšašowanja rucnikaŕskeje komory Chóśebuz. 30 procent měnje, by mógało lěpjej byś. Wósebnje w twaŕskem źełaŕstwje bywaju měnjej a měnjej nadawki. Mjazy drugim pominaju wót politiki wóttwaŕ berokratije a problem felujucego dorosta wóstanjo. Tomu kśe něnto napśeśiwiś ze zapłaśonym praktikumom za wuknikow.