Wót togo tyźenja jo Měto Nowak wjednik mjeńšynowego sekretariata w Barlinju. Dolnoserb Nowak jo był do togo referent serbskego zagronitego w kulturnem ministaŕstwje kraja Bramborskeje. Móžo se něnto z nowym wjednistwom źěło zasej intensiwěrowaś, tak Karl-Peter Schramm, pśedsedaŕ Mjeńšynoweje rady. Aktualnje zabjerjo se mjeńšynowy sekretariat z digitalizaciju, z wójowanim pśeśiwo diskriminaciji Sintow a Romow a procuju se wó zapisanje mjeńšynow do zakładneje kazni. Mjeńšynowy sekretariat jo nosony wót Domowiny. Wón jo kontaktowy běrow wšyknych styrich narodnych mjeńšynow w Nimskej a powědarjow Dolnonimšćiny do zwězkoweje politiki.

+++

Chto jo był Jan Awgust Měrćink a co jo nadejšeł? Wó tom jo było to grono ten tyźeń srjodu w Serbskem muzeju. Pśednosowałej stej Mechtild a Wolfgang Opel, kótarejž stej lěta dłujko wó Měrćinku slěźiłej. Napisałej stej knigły “Dokulaž som luź/Weil ich ein Inuk bin", kótarež su srjodu tejerownosći pśedstajili. Pśednosk ako teke knigły su wubuźili wjelicny zajm mjazy pśibytnymi.
W januarje lěta 1850 jo zastupił Jan Awgust Měrćink engelsku płachtatu łoź a jo se sobu pódał na ekskursiju do lodowego mórja blisko Kanady a Labradora. Wón jo był Serb z Górneje Łužyce a misionaŕ. Ako taki jo južo mjazy ludom Inuit w pódpołnocy žywy był. Na ekspediciju su jogo sobu wzeli, dokulaž jo rěc Inuit mógał a se wuznał z jich žywjeńskeju wašnju.

+++

Pśi góźbje 30-lětnego jubileja wóžywjenja jeje źěłabnosći jo Maśica Serbska, dolnołužyske wótźělenje Maćice Serbskeje, pśewjadła pětk swóju głownu zgromaźinu. Na tej głownej a zrazom wólbnej zgromaźinje jo se zasej Pětš Šurman wuzwólił ako pśedsedaŕ a ako jogo zastupnik Hartmut Leipner. Antje Golcowa njejo wěcej kandiděrowała. Ceła Maćica Serbska ma 106 cłonkow, ta dolnołužyska 20. Wěcej wó zgromaźinje Maśice Serbskeje słyšyśo w našom wusćełanju hyšći źinsa.

+++

Pśeśiwo AfD, pšawicaŕskemu ekstremizmoju a pódpěrje wójny pśez rusku-ortodoksnu cerkwju: Synoda ewangelskeje cerkwje Barlin-Bramborskeje-šlazyńska Górna Łužyca jo se wugroniła k wjelikim temam. Na zmakanju w Zgórjelcu jo wobzamknuła, až cłonkojstwo abo zgromadne źěło z AfD njedajo se dogroniś z kśesćijańskimi gódnotami, glědajucy na dalšne radikalizěrowanje partaje. Chtož pśeśiwo demokratiji wójujo, musy z tym licyś, až ewangelska cerkwja se pśeśiwo tomu staja. W Baršću jo dla togo južo dało konflikty, wó tom jo rbb rozpšawił. Dalej jo synoda mócnje zasuźiła pódpěru rusko-ortodoksneje cerkwje za wójnu Ruskeje w Ukrainje. Tamna cerkwja zašćitujo nadpad ako "swětu wójnu". Wójna njamóžo žednje swěta byś, tak stoj we wobzamknjenju synody. Wušej togo deje se pady seksuelneje namócy w cerkwi dalej naźěłaś. Nanejmjenjej personalne akty fararjow deje se systematiski pśeslěźiś, rozsuźijo cerkwiny parlament. We njom statkujo 108 duchownych. Wóni zastupuju wušej 800.000 wěrjecych w Barlinju, Bramborskej a pódzajtšnej Sakskej.

+++

Pśed 2038 žedna cysta Sprjewja. Tak dłujko trajo nejskerjej hyšći źěło na brunej Sprjewi w Grodku. Pśi bergaŕskem forumje ten tyźeń wałtoru jo akciski zwězk wó móžnych napšawach diskutěrował ze zastupnikami města. Nejwažnjejša napšawa - stwórjenje sto metrow dłymokeje sćěny w zemi (Dichtwand) pśi Łazu - buźo hyšći 8 lět traś. Teke financěrowanje njejo hyšći jasnje, tak gronje zastupniki koncerna LEAG. Grodk jo mócnje wót bruneje Sprjewje pótrjefjony. Zelezowy oksid we wóźe nješkóźi jano rostlinam a zwěrjetam, wustatkujo se teke na turizm a atraktiwitu města w strukturnej změnje, tak šołtowka Christine Herntier.