Uni medicina pśiźo / Universitätsmedizin Cottbus
Chóśebuz dostanjo skóńcnje swóju uniwersitnu medicinu. 1. julija buźo se Medicinska uniwersita Łužyca Carl Thiem załožyś. Wědomnostnu radu jo koncept zasadnje pśeznanił, tak to wóna zdźělijo źinsa na casnikaŕskej konferency. W pśichoźe kśě se medicinarje a slěźarje w Chóśebuzu zaběraś ze slěźenim strowotniskego systema a z digitalizaciju strowotnistwa. To stej w Nimskej jadnoraznej śěžyšći. Za dwě lěśe, 2026, deje prědne studenty how z wukubłanim zachopiś. Uniwersitna medicina jo nejdrošy projekt w strukturnej změnje. Zwězk a kraj inwestěrujotej pó aktualnych licbach 3,7 miliardow euro.

+++

Wólbne plakaty wótpórali / Wahlplakate entfernt
We wěcej měsćańskich źělach w Chóśebuzu su njeznate kóńc tyźenja we wjelikem stilu wólbne plakaty wótpórali. Stało jo se to w nocy na njeźelu. Partaja SPD powěda sama wót nanejmjenjej 70 plakatow, mjazy drugim w Škódowje, Rogoznje, Žylowku a teke w Žylowje. Hyšći njejo policaji pó informacijach rbb žedno wuzjawjenje pśedlažało.

+++

Serbske koparje na instagramje / Wendische Fußballer auf Instagram
Towaristwo "Serbske koparje/Wendische Auswahl" ma nowy wustup w socialnych medijach: Wót kóńca slědnego tyźenja móžomy na socialnej platformje Instagram wjele zgóniś ze źěła "Serbskich koparjow". W dogromady 9 źělach se pśedstajiju wuwiśe a wjeraški towaristwa pó swójom załoženju w lěśe 2017 w Dešnje až do źinsajšnego a to z wjele fotami a tekstami. W běgu togo tyźenja budu kuždy źeń nowy źěl wózjawiś.

+++

Janšojska Domowina a módrośišć / Jänschwalder Domowina und Blaudruck
Za serbske ludowe rucnikaŕstwo a wósebnje za módrośišć se zajmuju cłonki domowinskeje kupki Janšojce. Cora su togodla jěli do srjejźneje Łužyce. Nejpjerwjej su se woglědali bolanu brožnju na Horach w gmejnje Halštrowska Hola (Elsterheide). Tam ma mejstaŕka za mólowanje głažka a porclina Birgit Pattoka swóju źěłaŕnju a wustajeńske rumy. We Wórjejcach su se Janšowarje woglědali drastwiny dom Jatzwauk. Wósebnje za tamny skład rědow za módrośišć su se zajmowali. Z wobsejźaŕku Kirsten Ann Bejmineju kśě nawězaś wuske kontakty dla zasejwóžywjenja módrośišća we Łužycy. Janšowarje planuju teke pśi sebje we jsy źěłaŕnju za módrośišć natwariś.

+++

Domowinarje su se w Mósće zmakali / Treffen Domowina Heinersbrück
Domowinska kupka w Mósće glěda na aktiwity togo lěta. Pětk wjacor su w gmejnskem centrumje powědali wó prědkweześach. Ten tyźeń pětk kśě wupórěźaś a cysćiś wopomnišćo padnjonych wójakow Drugeje swětoweje wójny na kjarchobje. Zgromadny wulět do Noweje Cale jo planowany w septembrje. Mósćański swajźbaŕski pśeśěg buźo se wobźěliś na swěźenjach w Drjowku a w Hochozy. Znowa co ten pśeśěg swěśiś swójo 50-lětne wobstaśe. K tomu nastawa tuchylu publikacija.

+++

Nowy amtski direktor / Neuer Peitzer Amtsdirektor
Rybakaŕske město Picnjo ma wót źinsajšnego nowego amtskego direktora. Norbert Krüger z Mósta pśewzejo amt Elviry Hölzneroweje. Wóna jo južo w nowembrje šła na wuměnk. Wót togo casa jo komornica picańskego amta, Kerstin Lichtblau, tuchylnje nadawki pśewzeła. Norbert Krüger dej w pśiducych 8 lětach ako picański amtski direktor źěłaś. Do togo jo studěrowany inženjer źěłał w krajnem wobswětowem amśe.

+++

Kśižowe zele / Jakobskreuzkraut wächst wieder
Wón zasej wšuźi rosćo: Kśižowe zele kwiśo tuchylu zasej na pólach, łukach a pśi drogach. Ta žołta kwětka wuglěda rědnje, ale jo gadowata, wósebnje za skót. Łuki, źož ta kwětka rosćo, njamógu se pósec za futer. Wósebnje kónje, krowy, wójce a kóze su wobgrozone, wóni njamógu zele w suchem senje spóznaś. Kśižowe zele jo se wósebnje w slědnych lětach masiwnje wupśestrěło. Wóno rosćo derje w suchej a pěskowatej zemi.