Zjadnośone dolnoserbske chory spiwaju "Narodnej zemi" z kantaty "Doma rědnje jo". Kantatu jo komponist Detlef Kobjela ekstra za dolnoserbske chory spisał. Jaden tema cora na spominańskem wjacoru za serbskego komponista w Dolnoserbskem gymnaziumje. Za Lubinu Žurec-Pukačowu, něgajšnu wjednicu chora Łužyca, jo Kobjela z tym něco rozsudnego stwórił. Wón ma wjeliki wuznam za chorowe gibanje w Dolnej Łužycy, jo ze swójim wěncom serbskich arijow wopšawdu kšusił lubosć Dolnoserbow k swójej domowni. Ale to njejo było wšo. Statkowanje Kobjele, kenž jo 2018 zemreł, jo se cora we wšakich facetach hyšći raz k žywjenju pśišło. Serbski ludowy ansambel jo pśepšosył pśijaśelow a pśełožowarjow dolnoserbskego komponista. Mjazy nimi komponista Jan Cyž a Ulrich Pogoda, něgajšny prědny fidlaŕ ansambla Karl-Heinrich Starke a chorowa wjednica Lubina Žurec-Pukačowa.
Wósebnje jogo statkowanje za Dolnu Łužycu jo było we fokusu. Njejo teke pśipad, až su se zmakali w awli gymnazija. Ako tamny muzikowy ceptaŕ jo generaciju wuknikow mócnje pregował. Jogo wutšoba jo napšawdu pśecej biła za domownju, we tom su se byli pśibytne zjadne. Ale wón jo teke wjele za budyšynski ansambel cynił. Jan Cyž a Karl-Heinrich Starke stej se dopominałej na te śěžke case pśewrota. Kobjela jo był tegdy intendant. Pśiskrótcenja ansambla njejo na kóncu mógał sobu nosyś. Za to su w ansamblu jomu źinsa hyšći źěkowne. Nic naslědku jo Kobjela teke z našym rozgłosom zwězany był, ako awtor a powědaŕ. Na to jo pokazał něgajšny muzikowy redaktor Ulrich Pogoda. Chwalili su Kobjelu ako kulturnego zamóžarja, ako jaden, ak pśecej jo luźam pomagał. Slědkoju jo šło wó pšašanje, co něnto z jogo derbstwom buźo. Kritizěrowali su, až druge ansamble kaž chóśebuske źiwadło zajma za to serbske njamaju. Serbski ludowy ansambel wiźi teke, až zajm za klasisku muziku we cełku wóteběra. Pšawe wótegrono na to njejsu cora namakali.