Zastupniki europskich mjeńšynow mimo swójskego stata zmakaju se w Błotach. Źěłowy zjadnośeństwo Non-Kin-State pód kšywom Federalistiskeje unije europejskich mjeńšynow (FUEN) dajo mjeńšynam ako Łemkam, Ladinarjam abo Serbam móžnosć se wuměniś k wuchowanju a woplěwanju swójskeje identity a rěcy. Wót corajšnego až do pětka warnujo seminar w Lubnjowje, sobuorganizěrowany wót serbskego kšywowego zwězka Domowina. Źinsa k temje "Turizm ako šansa za mjeńšyny" pśednosuju Serby, ale teke zastupniki Ladinarjow a Frizow. Dalšny doglěd do situacije how we Łužycy dostanu wobźělniki seminara witśe pśi eksursiji pśez brunicowy rewěr.
+++
Prezidium Domowiny teke w Lubnjowje/ Domowina Präsidiumssitzung
Prezidium Domowiny jo se wałtoru na swójom pósejźenju we Lubnjowje mjazy drugim zaběrał z wólbnymi kopolakami za wólby krajneju sejmowu Sakskeje a Bramborskeje. Na 10 pšašanjow su se dojadnali, kenž něnto politiskim partajam pósrědniju. Wólbne kopolaki měrje se na pśikład na kubłanske nastupnosći abo wužywanje serbšćiny na digitalnem pólu. Gaž wótegrona partajow pśedlaže, buźo Domowina je wózjawiś.
+++

W Hochozy su pónjeźele wobradowali cłonki wejsneje domowinskeje kupki. Wobzamknuli su, až se aktiwnje wobźěliju we jsy na Bramborskem wejsnem a žnjownem swěźenju w septembrje. Za swěźeński pśeśěg kśě pśigótowaś wobraz wejsnego žywjenja, z kótarymž kśě se teke južo kóńc awgusta w Dešnje prezentěrowaś. Na tamnem domowniskem a drastwinem swěźeńju kśe pón za hochoski swěźeń wabiś. Teke pśi swěźeńskem wugótowanju swójeje jsy kśe hochoske Domowinarje pódpěraś. Stary gmejnski berow napśeśiwo gósćeńca "K złośanemu plonoju" dej nowe woblico dostaś a wjelike pupki ze słoma deje skóro južo woglědarjow do jsy witás.
+++

Jězba z taksijom by mógała we wokrejsu Sprjewja-Nysa skóro droša wórdowaś. Wótpósłańce wokrejsnego sejma deje źinsa wó tom wótgłosowaś. Inunga taksikarjow jo pšosyła wó pśiměrjenje tarifow. Wobtwarźili su to mjazy drugim ze stupajucymi mytami a wušymi płaśiznami za bencin. Zakładna płaśizna za jězbu by tak stupiła wót 3,50 na 4 euro, kuždy kilometaŕ by płaśił 2,50. Gaby wokrejsny sejm źinsa tomu pśigłosował, by nowy tarif wót julija płaśił.
+++

Rucnikaŕska komora Chóśebuz wobradujo źinsa zgromadnje z Jobcenterom k powołanjam w rucnikaŕstwje. Młode luźe dostanu źinsa prědne informacije k wšakorakim rucnikaŕskim powołanjam a mógu na městnje teke prědne praktiske nazgónjenja zběraś, na pśikład z digitalnym simulatorom za skowanje (šwejsowanje) abo pśi lakěrowanju. Teke pšašanja mógu zajmce za wukubłanje se wě stajiś. Zarědowanje jo we wótnožce Jobcentera w Knorawje na droze Makarenkego 5 a źo wót zeger 14.00 do 17.00.