Na swóju slědnu zgromaźinu pśed komunalnymi wólbami jo se ten tyźeń zmakał wokrejsny sejm Sprjewja-Nysa. Krotko do wólbow su měli wótpósłańce dosć źěła. Su se mjazy drugim zaběrali ze stawom strukturneje změny we wokrejsu, z twarjenim noweje wjelikeje šule w Gołkojcach a su wobzamknuli teke wuše płaśizny za taksi.
A hyšći jadna wěc jo wótpósłańcow zaběrała. Rozžognowali su se na zgromaźinje z jadneju dłujkolětneju sobuźěłaśeŕku, z Kerstin Kosakoweju z Depska. Wóna jo 28 lět dłujko w Baršću źěłała we wokrejsnem zastojnstwje za serbske nastupnosći a to wót nowembra 1996. W lětach 2005 do 2020 jo była wušej togo zagronita za rownostajenje. Kóńc julija se Kerstin Kosakowa něnto pódajo na wuměnk. Krajny raźc Harald Altekrüger jo jeje wuspěšne źěło wuchwalił a wusoko gódnośił. Wóna ma mjazy drugim wjelike zasłužby na tom, až su južo 1998 załožyli serbski wuběrk za wokrejs Sprjewja-Nysa.
Hyšći jaden dalšny serbski luź jo se na tom pósejźenju pócesćił: casnikaŕ Horst Adam. Harald Altekrüger jo jomu gratulěrował k 85. narodninam a jo se wuźěkował za to, až Adam južo 30 lět dłujko za Casnik rozpšawijo ze źěła wokrejsnego sejma.