Lětosne dolnoserbske źiwadłowe graśe "Smjerś pó štuckach" jo se cora slědny raz pokazał w Chóśebuzu. 80 pśiglědowarjow jo pśišło, pśewažnje wukniki Dolnoserbskego gymnazija. Dogromady 300 luźi jo se serbski błośański krimi woglědało, to jo zdźěliła Madleńka Šołćic wót Nimsko-Serbskego ludowego źiwadła Budyšyn. Pěś razow su staciju gótowali wu nas. Źinsa źo ned dalej z dolnoserbskim źiwadłom. "Tśmjel Hana" alias Hana Tśmjelojc jo wótněnta ducy pśez zakładne šule, horty a źiśownje. Elewka Bernadet Šnajdrec prezentěrujo ceły mjasec program za źiśi, mjazy drugim w Janšojcach, Bórkowach a Nowej Niwje. Źinsa buźo premjera w zakładnej šuli w Tšupcu.
+++
Jadna wjas pla Budyšyna, smy w 19. stolěśu. Johann Zaute, hyšći młody gólc pyta swójo městno ako ewangelski Serb, swóju identitu w towaristwje, kótaraž co nejlubjej to serbske wótpóraś. Nimska rěc jogo w šuli njezjapki wobłapijo. Tśi raze jo musał ako młoźeńc do pšuskeje wójny, pózdźej namakajo se zasej w statnej zeleznicy. Zeperu namakajo we wěrje až na slědny źeń swójogo wótměnjatego žywjenja. "Johann Zautes Lebensfahrt" jo titel knigłow wó toś tej historiskej wósobje. Spisała jo jen Sabine Bauer-Helpert, sama faraŕka na wuměńku. Wóna jo se intensiwnje nic jano ze Zautom, rownocasnje jeje prastarkim, ale teke z wobstojnosćami žywjenja na lanźe w 19. stolěśu zaběrała. Nastał jo napněty biografiski roman. Knigły dostanjośo pśed ludowe nakładnistwo Domowina. Awtorka pśedstajijo je witśe wjacor zeger 19.00 na farje w Slěpem.
+++
Sćo Wy teke byli pódla? 160 milionow luźi jo slědowało sobotu Eurovision song contestoju. Gaby mógał jano rozsuźiś publikum, by se něnto nejskerjej Chorwatska mógła wjaseliś. Kupka Baby Lasagna jo librowała bejnje wjeliku show mjazy hard rockom z ludowymi elementami a dark disco. Gaž sćo se woglědali w pśirownanju pśinosk dobyśarja Nemo ze Šwicaŕskeje - ceło drugi setting. Njejo trjebał nic drugego ako sebje samego a swój głos - skóro juž operowy - na jawišću. Na kóńcu jo jury rozsuźiła a dała jomu nejwěcej dypkow. Nemo, kenž bydli wěsty cas juž w Barlinju, jo wužywał jawišćo, aby zašćitował pšawa tak pomjenjonych non-binarnych luźi, stakim luźi, ako njewiźe se daniž ako žeńska daniž ako muž. Jadno pósołstwo za pšawa mjeńšynow w Europje.
How móžośo dobyśaŕski song ESC 2024 słuchaś: The Code wót spiwarja Nemo