Zmakanje młoźinskego aktiwa
Treffen Domowina Jugendaktiv in Gulben
Młoźinski aktiw Domowiny, to groni wjedniki młoźinow, su se zachadny tyźeń w Gołbinje zmakali. Nadpad na wachu jatšownego wognja w Myšynje jo jadna tema była.
Młodostne su pśišli we bogatej licbje, južo na tom jo było wiźeś, až su kśěli powědaś. Młoźinski koordinator Domowiny, Tobias Unger, jo pak kśěł tema jatšowne wognja nejpjerwjej pód blido padnuś daś. Akle pó napominanju młodostnych jo wón rozgranjańsku rundu wótwórił. Pśibytne wjedniki wejsnych młoźinow su pón wjelgin jasnje wugronili: "To njewótpowědujo našym tradicijam. Te wobźělone luźe teke njejsu źěl wejsneje młoźiny." su gronili a až se jasnje distancěruju wót togo statka. Za pśichod su se prědk wzeli, hyšći wěcej ze swójimi młodostnymi we jsy powědaś a jich napominaś, tradicije a nałogi z rozymom pśewjasć. Lěc take rozgrono płode njasu móžomy za dwa tyźenja wobglědowaś, gaž wejsne młoźiny majske bomy stajaju abo je susedam wótrězaju.
+++
Luna party w galeriji Fango
Luna Party in der Galerie Fango Cottbus, 20.04.2024, ab 20.00 Uhr
Sobotu, 20. apryla, dajo how w měsće w galeriji Fango party wót a za žeńskich a za wšyknych drugich. Luna Party jo moto a powědaś dej se tam wó roli žeńskich w serbskej kulturje. Zachopjeńk jo 20.00. Pokazaś kśe krotkej filma "Křižerki" a "Pytaś a namakaś". Pótom jo podiumowa diskusija planowana a muzika pśiźo wót paska respektiwnje wót DJow. Organizatorki na to pokazaju, až se až do zeger 23.00 njekuri.
+++
Star Wars: wustajeńca w Barlinju
Star Wars Ausstellung im Napoleon Komplex Berlin
Chtož co raz pšawje wen ze serbskego swěta, daś se wót pśiducego pětka raz do Barlinja wupóra: Tam wótwórijo wustajeńca k Star Wars uniwerzumoju. The fans strike back jo titel nejwětseje zběrki wót fanow za fanow. Z modelami kosmiskich łoźow, swětłowymi mjacami, sławnymi kostimami a skulpturami. Wustajeńca jo w Napoleon Kompleksu na Modersohnstraße 35 - 45 w Barlinju. Kórtki płaśe 22, 50 abo pótunšone 18 euro.
+++
25 lět radijo Satkula
25 Jahre obersorbische Jugendsendung Satkula vom MDR
Naše kolegi wót górnoserbskego młoźinskego radija Satkula su měli zachadny tyźeń krass jubilej: 12. apryla pśed 25 lětami su prědny raz wusćełali. Wót togo casa górnoserbske młodostne kužde pónjeźele wjacor zeger 20.00 swójo wusćełanje maju, rozpšawiju wó swójich temach a graju swóju muziku. Wóni wšykno sami pśigótuju a njesu jano w radiju prezentnje ale teke live na městnje, na pśikład lětosa w lěśu zasej pśi jich wolejbalowej turneji pśez wjaski. A teke naš dolnoserbski Bubak ma Satkuli wjele źěkowaś: My Bubaki, gaž smy našo wusćełanje pśed 20 lětami załožyli, smy se wjele wót Satkule wótglědali. Smy tencas w Budyšynje na woglěźe byli a smy se tam live wusćełanje woglědali.
Also, fajn wěcka a dalej tak! My kolegam nejwutšobnje hyšći raz gratulěrujomy na tom městnje!
